Aizawl mipui mask vuah lo
Sorkar laipui chuan Covid-19 inkai chhawn zel lohna turin mipuite chu pawn an chhuah dawna hmai tuamna (face mask) hmang turin a ngen a; World Health Organization leh US Centre for Disease Control and Prevention pawhin mipui nawlpui tan mask hman hi a ṭhat thu an lo chhuah tawh bawk.
Covid-19 hri len tirh lamah khan mask hi mipui nawlpui tana hman kher ngai lo angin sawi mah se, mithiamte chuan fimkhur thuah mask vuah zel hi a ṭhat zawk thu an hmu chhuak zel a; Covid-19 damlo enkawltute leh a hri veite'n mask ṭha bik (N-95 mask) hmang ngei se, mipui nawlpui tan chuan ṭhui chawp (home made mask) vuah pawh a tawk tura ngaih a ni a, hri leng beihnaa tlar hmasaa dingte (frontline worker) tan mask ṭha chi vuah hram tura ngenna pawh a tam hle.
Mizoram district ṭhenkhatah DC thuchhuak angin mask vuah loa khawlaia kal chhuah phal a nih lohlaiin Aizawl khawpuiah chuan mask hmang loa veivak an la tam hle - dawr hawn phal bik nghaktu, office kai, lirthei khalhtute leh khawlaia kal mipui nawlpui zingah mask vuah lo hmuh tur an la tam hle.
Covid-19 doin ramriah mi tlawmngaite ruah leh thosi karah an riak chhuak a, khawpui chhung hmun nuam china mask vuah mai mai pawh kan peih/thei lo a nih chuan, he hripui vennaah hian kan ṭang rual tawk lo tihna a ni dawn. Covid-19 hi khawilaiah emaw chauh do theih a ni lo a, mipui kan ṭan rual a ngai. Mask vuah te, inkhung te, kut silfaite hi mithiamte'n ti tura min chah angin i zawm hram ang u.