Two Wheeler Taxi hmanga politics khelh a ni em?

Two Wheeler taxi neitute harsatna hrang hrang sut kian sak turin ZPM Ṭhalaite chuan Aizawl Mayor an ngen a, stand tam zawk siam turin an ngen.

ZPM Ṭhalai chuan Aizawlah Two Wheeler Taxi permit an pek chhuah tam avangin Two Wheeler Taxi hmanga eizawngtute'n har­satna an tawk tih sawiin December 15, 2018 hma lama permit 691 chiah pek chhuah a nih­laiin November 20, 2020 leh March 4, 2021 inkar, thla li chhungin per­mit 1,889 pek belh a nih thu an sawi a; politics-a induhsakna atan hmangin mamawh­­tute pawh ni lo, hralh chhawn leh tura party mite hnena permit thei semah puhin Two Wheeler Taxi hmanga eizawngtute an buai phah nasa a, stand pawh an indaih lo hle niin an sawi.

Mamawh tawka sem chhuaha eizawnna ṭha tak ni thei hi mamawh tawk aia tama sem chhuah a nih chuan an inṭam chhuah ve thei a, hun rei lo te chhunga Aizawl khawpuia tlan tura Two Wheeler Taxi permit an sem chhuak chiam mai hi chu a nghawng a pawi dawn hle a ni.

Tu sorkarah pawh hetiang thil hi tih tawh loh ni se, sorkar hmasain permit a pek chhuahah kan party mite an lo tlem deuh a nih pawhin anni vaw chhe tur kher lo pawhin mahni lam induhsakna pawha hetiang thil hi chu tih tawh loh a ṭha a, mi tam tak eizawnna tichhetu leh traffic jam tizualtu mai a ni thei.

Sorkarin traffic jam tihziaawm tumin sum tam tak sengin PAHOSS tihte a buat­saih a, kawng chhawngte siam tumin hmun ṭhenkhatah chuan lei verhte pawh a tintuah mek a nih hmel a, chutihlaia khawpui titawt zawng leh eizawnna tibuai thei khawpa thla li chhunga Two Wheeler Taxi permit he ti zat pek chhuah hi chu politics khelhna anga miin an puh a nih pawhin puh âwm renga ngaih theih a nihna a awm ve thei a ni.