Ramri buaina leh kan ram hruaitute

Mizoram leh Assam ramri buai avanga Silchar Mizoram House-a Mizo lirthei tángte chu November 9, 2020 khan Assam police vènna hnuaiah Mizoram hruai thlen an nih hnuah Mizoram pan tur lirthei dangte erawh chu chhuahtir an ni lo; Mizoram mamawh phurtu lirthei tam tham tak Assam chinah an la tâng. 

Sorkar laipui ruahman anga Mizoram leh Assam chief secretary-te an inbiak hnuah ramria state police duty-te ko kira central force duty-tir an rem ti ve ve a, Assam-in Mizorama lirthei lut tur an dan pawh chhuah tura tih an ni. Mizoram lamin an tih tur an ti fel thawkhat a, Assam pawhin Silchar lama Mizo lirthei tangkhangte chu Mizoram ramri thleng an rawn hruai a; nimahsela Mizorama lut tur lirthei dang ṭhahnem tak chu an luh an remti ve ta lo a, hei hi kan state hruaitute tan 'ngawi renga thlir' chi a ni tawh lo ang. 

Assam nena ramri buaina kan neihah hian kan ram hruaitute hian sorkar laipui leh Assam lam state hruaitute thu hi an ngaichang thiamin an dawhthei em em a, hei hian rah ṭha zawk a chhuah châng a awm thei ngei ang a; nimahsela Assam lamin an police-te mit hmuh ngeia an duh duha min dan a, an duh huna an chhuah a, an tihkawi an tihkawi kan ni chunga Assam sorkar demna emaw, chumi lam hawi ṭawngkam pawh kan la chhak chhuak ngam lo a nih chuan, thil kal vel dan hi ngaih­tuah ngun a ngai ta khawp mai.

Mizoram mamawh lo lut tur dangtute hi hetia a lan dan chuan Cachar district chhungah pawh an khaw hmawr ber Lailapur-a mi tlem te hi an ni maiin a lang.

Chutihlai chuan heng mite'n kawngpui an dang tur veng duh miah lo leh kawngpuia lirthei kal tlang tura ruahmanna siam duh miah lo chu Assam sorkar a ni.  

Assam sorkar hnuaia an DC ngeiin kan state chhunga thlam a haltir tawh hnua Assam police lamin Mizoram kawng dangtute hnawh kian an tum miah lo hian he buaina hi Assam-a sorkarna vawn fung chelhtute ruahman a ni tih loh a harsa tawh a, chu mite chet dan dema Assam sorkar sawisel ngam lo hruaitu hlir kan nei a nih chuan tawrh tlawk tlawk mai hi kan inhmeh tawk pawh a ni reng thei. 

Kan CS-te ve ve pawh vawi khat aia tam an indawr tawh a, anni level-ah inremna ṭha tak a awm hnua min la dang zui zel chunga kan ram hruaitute an la ngawi tlat a nih chuan Assam sorkar hi an hlau anga puh mai an awl dawn. Kan ram china silai ṭha ber ber nena kan inchhawp ringawt hian mipuite a thlamuan zo tawh lo a, ei tur man a to zel bawk. Nitin mamawh a vang ṭan tawh a, Assam-a kawngpui dan titawp tura Assam sorkar dem leh kar ngam loa remchang lo chung chunga state dang kan pur ruaite pawh hian ngaih a tiṭha lo zo ta.

Kan state hruaitu zingah Assam sorkar official-te leh an mipui mai ni lo, a tihtirtu ber nia lang Assam sorkar dem ngam a, Mizoram min tibuaitu Assam sorkar chet dan sawisel ngam kan awm lo a nih chuan ramri buai emaw kan tih hi Assam inthlan tur nghawng thil kal zela puh loh a harsa dawn a ni.