Sorkarin a thupek kengkawh se

Mizoram sorkar chuan Covid-19 dona atan rua­hmanna a siam thar zel a, October 16 thlenga hman tur inkaihhruaina (Standard Operating Procedure) a siamah Aizawl Municipal Corporation huam chhungah zan dar 8:00 hnuah curfew puan a ni a, Pathianniah lirthei tlan chhuah phal a ni lo bawk.

Sorkar hian in­kaihhruaina hrang hrang a siam ṭhin a, hengte hi chak tak leh khauh taka bawhzui a nih ṭhin rualin a chang chuan thupek chhuah hi a duhtawk mai emaw tih tur a ni. Hripui a leng rei ta a, hnathawktute an hahin an rimtawng tawh a, hei vang pawh hi a ni mai thei, tun hnaia SOP thar duan kenkawh kawngah sorkar a vuaicha deuh niin a lang a, ṭan lak thar a ṭul hle.

Zan dar 8:00 hnua curfew puan pawh hi mi tam tak chuan ṭul tawh lem loah an ngai a, chutihlaiin sorkar lam chuan curfew puan ngei hi ṭulah an la ngai thung niin a lang a; nimahsela curfew kengkawh turin sorkarin tha a thawk ṭha tawk lo. Khawpui lûnlai hmun tlem te-ah duty an dah pheuh pheuh tih loh chu curfew kengkawhtu hmuh tur an vang a, Aizawla kawngpui lûn ber Bawngkawn-Kulikawn tih lohah chuan zan lamah mihring leng chhuak leh lirthei vaivak hmuh tur pawh an tam leh ta hle.

Pathiannia lirthei chhuah phal loh pawh a ziakin awm mah se a taka bawhzui a ni meuh lo a, lirthei veivak an tamin ṭul bik thil ni lem loa leng khawthawng pawh hmuh tur an tam leh ta.

Sorkar hian thupek a chhuah chuan khauh takin kengkawh se, tute emaw eizawnna leh hna ṭul tibuai tawk lek, a bawhchhe duhtute tana bawhchhiat timna tur awm lem loa duty pawh awm mang loa curfew puan maite hi a fuh lo a, sorkar hian thu a pe a nih chuan a kenkawh lamah ṭan la thar thei se a lawmawm khawp ang.