Youtuber-te an inzir a ngai

Mizoram State Commission for Protection of Child Rights (MSCPCR) chuan, tun hnaia kum tling lo hmeichhiat mipatna kawnga khuaikhem tawk chung changah miin a tuartu hriat zui theihna tura thil ti an awma an hriat thu leh, dan anga an umzui tur thu an sawi.

Tun hnaia Mizo­rama thil lar tak mai chu social media chi khat YouTube hi a ni. YouTube hi 'online video sharing' an tih mai internet kal tlanga video-a thil thehdarhna a ni ber ang chu. YouTube-a thil awmte hi a entu leh social media lama umzuitu (subscribe, like, share) an ṭhat­hnem dan aizirin a video dahtute/ chhuahtute hian pawisa an dawng thei a, Mizo zingah pawh YouTube-a sum lalut mi ṭhahnem tak an awm ta a, eizawnna chi khat angin a sawi theih ang.

Hetihlai hian YouTuber an tih mai zingah hian media lam zirna nei lem lo, tun hmaa media lama la thawk ngai lem lo leh chinchang hre vak lote an awm nual a, anni hian vantlang hriata thil chhuah tur leh chhuah loh tur an thliar hrang thiam tawh lo a, hei hian nghawng na tak a la nei dawn chauh niin a lang.

Ṭhenkhat hi chuan an thliar thiam lo a ni chiah lo a, entu leh umzuitu an duhthawh luatah an thliar phal lo a, Mizo mipui vantlang nunah nghawng ṭha lo nei dawn mah se YouTube kal tlanga an sum hmuh a pun dawn chuan pawi an ti lo a ang hle.

He thil hi ngun taka kan zir chian a, kan umzui deuh loh chuan kan khawtlang nun hi nasa takin a nghawng dawn niin a lang a; kan hriat kher loh atana ṭha zawk thil tam tak an kher chhuak a, kum tling lo leh naupang thlengin an en ve zel tawh a, hetiang zela 'hmuh duh tur' zawng kan pun zel chuan a entute nunah a ṭha lo zawngin nghawng a nei thei dawn a, kan fimkhur a ngai hle.

Media pangngaiah chuan pawl mumal tak awmin thawktu tam tak hi a zira inzirte an ni hlawm a, social media lamah chuan chutiang taka inkaih­hruaina chu a awm hleithei lo a; nimahsela tun hnaiah chuan traditional media kan tih maite aiin social media hi a chakin nghawng pawh a nei na zawk emaw tih mai tur a ni tawh a, hei vang tak hian Mizo YouTuber-te pawh an inzira an insum thiam a pawimawh. Sum ûm ringawt loin Mizo khawtlang nun tana ṭha leh ṭha lo thliar thei hram se a ṭha hle ang.