Mask vuahin i ṭang rual ang u

Mizoram sorkar chuan October 11-20, 2021 hi 'All Mask Campaign' atan a puang a, State Level Expert Team on Covid-19-in hripui kan do hneh theihna tura ruahmanna an siam a ni. He mi hun chhunga mask kan vuah ṭhat chuan hripui darh zel tur hi thui tak ven theih a nih an rin thu mithiamte chuan an sawi.

Mizoramah Covid-19 hripui a darh zau zel a, nitin mai a sang biin positive hmuh belh zel an la ni. State ṭhenawm leh India ram state dangte an tlakhniam zel laiin keini chu a ni telin hripui vei kan pung thung a, lockdown rei ber leh kawng hrang hranga inkhuahkhirhna nei khauh deuh ber kan ni chunga hri a darh zel chhan pakhat hi chu Covid Appropraite Behaviour (CAB) kan zawm ṭhat loh vang niin mithiamte'n an sawi.

Tun hnaia an hmuh chhuah zingah hripui dona hmuna a taka thawktute'n mask ṭha taka hmangin hripui an kai tlem hle a, positive chenpuite zingah ngei pawh mask hmang ṭhate chu an him thei tlat a ni. Hei vang hian kan hlauh em em leh nasa taka min tibuaitu Covid-19 laka thui tak min veng theitu chu ṭha taka mask kan vuah hi a ni a, he ni 10 chhung na na na hi chuan theihtawp chhuahin i ṭang tlat ang u.

Chenna inah inkai darh a nasat avangin in chhunga mask hman an rawtte pawh zawm thei ila, a huhoa chaw ei loh rawtnate thleng hian kan zawm ṭhat chuan he ni 10 chhung hian hripui ṭai darh zel tur hi thui takin kan veng thei ang.