Thilpek leh a petute

National Highways and Infrastructure Development Corporation Ltd (NHIDCL) chuan tun hnai khan Mizoram tana hman tur ambulance paruk an pe a, Chief Minister kutah an hlan. He mi hnu hian Chief Minister leh NHIDCL hotute ṭhukhawmin an hnathawh tur ruahmanna awmte an thlirho nghal a ni.

Kan rama kawng­pui siamtu NHIDCL-in an hnathawh pang­­ngai piah lama luang chhuaka mipui­ mamawh hriaa ambulance min hlan hi thil lawmawm tak a ni a, sorkar lam pawhin ṭangkai takin a hmang zui ngei ang. Vanduaithlak takin tun hnaiah Covid-19 hripui tuar nasa state zingah kan tel ta reng mai a, khawvela mipui tamna rama cheng ni siin mipui nuai 10 vel lek hi hripui vei nei tam zingah kan lang ta reng mai a, hei vang hian puih pawh kan ngai nasain ṭanpuina pawh kan dawng ta mawlh mawlh mai.

Kan politician-te'n an theih leh remchan ang angin CSR aṭangin ambulance leh hripui dona hmanraw dangte an dil chhuak a, kan officer lian zingah a bikin hnam dang central service officer kan kawlte pawhin state pawn aṭangin CSR kal tlangin ṭanpuina an dil chhuak ta nual mai. Hengte hi thil lawmawm tak a ni a, kan state budget pawn lam aṭanga ṭanpuina kan hmu hi a lawmawm a, chutih rualin fimkhur thiam erawh a pawimawh reng a ni.

Kan kawngpui min siamsaktu NHIDCL nen hian an kawng siam danah thu inhmu lo deuh te, an siam muan avanga mipuiin an tawrhnate thlengin a lo awm tawh ṭhin a, anni hnen aṭanga a langa thilpek dawn hian an hna lamah nghawng lo se, Mizoram sorkar thuneitute lakah pawh rawn pangchang sawt chuang lo se a ṭha hle.

Ṭanpuina min pe hi kan lawm rualin kawngpui ṭha leh tlo, fur a nih tak avanga chhe mai mai lo leh sawi mam chawp ngai lo min siamsak se kan lawm zawk hial awm e!