Police indaihlohna hi

Mizoram leh Assam ramri vengtu, Mizoram police ṭhenkhat chu an hmunpui lamah koh kir mêk an ni a; ramriah boruak ṭha lo a awm tawh loh avang leh police indaihlohna avanga koh kir an ni. Hetihlai hian ramri vengtu tur hi police eng emaw zat dah zui zel an la ni.

Mizoram sorkar tán ramri veng tura englai pawha police ṭhahnem tak dah reng hi thil hautak tak a ni a, kan sum leh pai neih leh kan police neih pawhin a daih lo chin a awm thei ang. Ramri lamah boruak ṭha lo a awm zui lo a nih chuan inlak kir ṭhen hi thil sual a ni lem lo mai thei a, chutih rualin kan ṭhenawm state-te chet duh dan en hi chuan ngaih ṭha taka kalsan chi erawh a la ni lo ang.

Tun hnaia Mizorama thil thleng hrang hrang avangin police lam an rimin an indaih lo hle tih a chiang a, chutihlaiin police ṭhenkhat kan chhawr dan en hi chuan tun aia ṭang mar thei deuh tur chu kan la nih hmel. Hripui len vanglai tak, ramri lama buaina a awm hnuah pawh police officer ṭhenkhatin danin a phalsak zat aia tam sipai an la kawl thei tho a, sorkar hna ṭul ni lem lo mimal hna ṭul thawk tura an la awm theite hi thil inhmeh tak a ni lo.

Sorkarin hlawh a pek kan police-te hi state-in a mamawh huna hman turin awm reng thei se; ramri lam hi chu a vengtu an nih angin boruak thlirin inkoh kir ṭhen hi a ṭha tawh zawka ngaiin an kalpui a nih hmel a, indaih loh vanga koh kir ngai tur khawp erawh ni lo se a ṭha hle ang.