Kan ngam loh kuhva phurte?

Champhai district magis­trate chuan tun hnai khan thuchhuah siamin Champhai district-ah dan loa kuhva leh sumdawnna thil dang phur lirtheite thla hnih chhung tlan khap a nih thu a puang. Thupek zawm lote chu IPC section 188 hmangin hrem an ni ang.

He thuchhuah hrim hrim aṭang pawh hian kan din­hmun makzia leh dik tawh lohzia chiang takin a lang. Dan lo kuhva phurte tlan phal loh thu a ni a, dan loa sum­dawnna kalpui hrim hrim pawh hi phal loh tawh sâ a ni. Chu thil phal loh ni si, tun thlenga ualau taka an kalpui thei reng si leh kawngpui zawng zawng rap chhe khawpa an ngampa tlat mai hian ngaihtuah a tithui hle.

Kuhna rah ro hmanga sum­dawnna hi dan kalh a ni a, a nihna takah chuan smuggling chi khat a ni. He thil hi sorkar thuneitu lam hian an hre lo a ni lo a, an ngaimawh duh tlat loh chhan erawh vantlang hriat ni lo mah se mi chinchang hre deuh chin hi chu an ngaih a ṭha lo a ni. A sorkar lam hi an lo ngawi tehreng a nih pawhin thil danga au chhuak ṭhin zirlai pawl pawh an kha a chih emaw tih mai tur a ni a; Champhai Sub Headquarters YMA lamin hmaizah tur an ngah vanga an ṭawng a rem lo a nih pawhin Central YMA hian he dan loa sumdawnna lian tâk, kawngpui tichhe khawpa an tâl velna hi a vei lo em ni le?

Ngaihtuah chian poh leh Kuhva rah ro hmanga sumdawnna kal­phung hi a mak; kawngpui pangngai an ven pawha an­mahni thua kawng an lai ngam maite leh a ram neitu khuaten an hnar/ dang duh lo nge an dang phal tlat lo maite hi a mak lehzual a ni. Hei hian he sumdawnna hi a hlawk hle a ni tih leh khaw chhak lama mi tam tak mai bakah Aizawla milian zingah pawh hausakpui an tam hle an tihte hian ngaih a tiṭha lo zo ta.

Engpawhnise dan loa sum­dawnna ni na nâ nâ chu kawng­pui an rah chhiat vang ni kher lo pawhin an veivah phalsak loh tur an ni. Kuhva rah hmanga sumdawnna kalphung hi chu a mak a, sorkar hotu liante leh kan rama pawl lian an ngawi tlat hi a mak lehzual.