October thla chhung chu i ṭang tlâng leh ang u

Mizoram sorkar chuan Covid-19 avanga inkaih­hruaina order October 1, 2021-a a lo tihchhuah tawh chu October 30 zanlai dar 12 thleng chhunzawm turin a pawt sei.

Hun rei tak chhung Covid-19 avangin kan buai ta a, kan duh vang ni loin inkhuahkhirhna hrang hrang kan paltlang a ngai. Mi tam tak eizawnnain a tuar a, chhungkaw tam takin an tlak chhiat phah a, ṭhenkhat chuan he hri hi an thihpui hian a ni.

Sorkar lam pawh nasa takin a insengso tawh a, hri len loh laia sum a hman ṭulna ni loah sum tam tak a hman a ngai a, hun leh tha tam tak a seng. Hmasawnna hnathawh turin a tuar a, hna tam tak ṭhulh a nih piah lamah an thawh theih chhunte pawh hripui vangin a khaihlak nasa hle a ni.

Sorkar chuan hripui laka kan himna tur leh hripui leng a lo kian theihna tur a nih beiseiin ruahmanna tam tak a siam a, Mizoram phei chu a inkhuahkhirh rei ber pawl kan ni ta hial mai; nimahsela vanduaithlak takin hripuiin min kian san lo mai ni loin India rama hri vanga buai ber pawl state kan ni zui mek, a vanduaithlak hle.

Engpawhnise he hripui hi kan duh vanga lo lut a ni lo a, sorkar leh mipui ṭang kawpin theihtawp a chhuah chung pawha dan theih loh a ni.

Tunah hian kan zavai atana ṭhatna tur a nih beiseiin kan sorkar chuan hripui avanga in­kaihhruaina leh inkhuah­khirhna a kalpui mek chu October 30, 2021 thlenga hman turin a pawt sei ta a; mahni thua lo zawm lo ve ngawt lo tur leh, thuawih taka zawm hram turin ṭan la thar ila, October thla tawp thleng hripui laka kan himna tura sorkar ruahmanna awmte hi i zawm ang u.