Thianghlim taka inthlan

Mizoramah inthlan a awm dâwn apiangin Mizoram People Forum-in inthlanna dik leh thianghlim a awm theihna tur an aupui ṭhin a, chu chu political party tinin an pawmpui thu ziakin an nemnghet ṭhin. Ṭun hnaiah Tuirial bialah bye election a awm dâwn a, hetah hian vote zawn danah thil fel tawk lo a awma ngaiin MPF chu thuneitute lamah zualko an tum.

Kan ram inthlanna kalpui dan hi mi tam takin ngaimawhin an sawi chhuak ṭhin a, a sawt mang lo emaw tih turin thil a awm leh ṭhin. Nimahsela, ngun taka kan thlir kir chuan MPF awm hma leh awm hnua inthlanna kalpui dan hi chu a inthlau hle tih a hriat a, dan hleihtheih loh thil a awm ṭhin avangin inthlanna fel famkim erawh a ni thei lo a, a dik lo leh fel lo lai hi chu a awm ṭhin.

Hetihlai hian tun hnaia Tuirial bial bye election awm tura titi leh a chinchang hria inti deuhte hi chuan pawisa a lêng nasa niin an sawi hlawm a, an inpe lai man chat theih awm si loah hian thil fel tawk lo a awm ngei niin a lang. He thilah hian a political party lam chu zawt se an tih ve loh thu leh an khingpuite lamin sum leh therhlo an sem thu an sawi ngei ang a; ualau taka an chet loh avangin man fak tur erawh an vang hle ang.

Engpawhnise, India ram hmun dang inthlan dan a dik loin sum sen a lo tam deuh a nih pawhin kan ramah chuan sum seng ve mang lovin felfai takin kan inthlang thei tih kan lantir tawh a, Tuirial bial bye election awm turah pawh hian dik leh thianghlim zawka vote zawn theih ni se a lawmawm hle ang.