Mask vuah inzirtirna piah lamah vil zui a pawimawh

Hmai tuamna vuah tura beihpui thlakna 'All Mask Campaign' hman lai mek chu October thla tawp thleng pawhsei a nih thu Health Minister-in a puang. He thu hi video kal tlangin deputy commissioner, chief medical officer leh IPRO hmaah a sawi.

Health Minister chuan Mizorama hri lêng dinhmun thlirin mask vuah tura inzirtirna chu ngawrh lehzuala kalpui a ṭula hriat a nih thu sawiin, "Hei vang hian All Mask Campaign hman lai mek October 20, 2021-a tawp tura tih chu October 31, 2021 thlengin kan pawtsei leh a ni," a ti a, campaign chhung hian ngawrh lehzuala mask vuah a himzia inzirtir a ṭul tur thu a sawi.

Mask vuah ṭangkaina leh a ṭulzia inzirtirna hi chu kum hnih dâwn kan kalpui tawh a ni ber a, hei hi mi ṭhenkhat chuan ṭun thlengin an la zawm ṭha lo. Mask vuah avanga kan him theih dan mithiamte sawi hi a ṭangkai em em a, Covid-19 positive enkawltu zingah mask vuah ṭhat avanga hripui kai an awm ve mang loh thu te, hripui lenlaia chawl loa hnathawktu police, health lama hnathawktu hrang hrang, bank hnathawktu, journalist-te leh lockdown lai pawha chawlh nei ve lo mi ṭhenkhatte hi an inven uluk chuan an chhuah tam avangin hripui hi an kai ngawt bîk lo tih a takin kan hmu a ni.

Hetihlai hian a zirtir ringawt hi chu a tawk lo a, khawpuia executive duty-te insiama mask vuah ṭha lo leh social distancing vawng ṭha lote bîk tura indah leh hi a hunlai tak a nih hmel. Hetia vantlanga hripui a darh hnu hian a sorkar lam hian tihngaihna awm tawh loah ngaiin mipui ven leh vil hna hi a thlah ta vek a ang lek lek a, mask vuah vek tura campaign bawhzuina atan hian puipunnaa mask vuah lo hremna lam hi lekkawh leh se a ṭangkai hle ang.

A zirtir ringawt te, zirtirna awm lem loa khauh taka invil ringawtte hi a ṭangkai tawk lo thei a, a pahniha kal kawptir thiam a pawimawh hle. Khawpuiah chauh lo pawh hripui a darh tawh avangin thingtlangah te hlei hlei hian Mask vuah inzirtirna leh a bawhzuina neih ṭhat a ṭul a, police leh thawktu indaih lohna hmunah pawh sorkar sikul zirtirtu zawng hi a vengtu leh viltu atan ruat ni mai se a ṭha hle ang (sikul kal tawh an awm a nih chuan an khuaah hripui a lêng vak lo tihna a ni a, executive duty neih a ṭul kher lo ang).

'All Mask Campaign' kalpui mek hi thil ṭha tak a ni a, campaign zawm ṭha leh ṭha lo vil zuitu hi awm se, mi tam tak hi vengtu neih vanga fimkhur sawt hi kan ni ve bawk a nia.