Thisen lâk leh MSHCS

Mizoram sorkarin Mizoram State Health Care Scheme (MSHCS) hnuaia sorkarin rate a siam zawm duh lo private hospital-te a pawmpuina (empanelment) a hlihsak hnuah, sorkar damdawi-in aṭanga thisen pek chhuah kawngah pawh MSHCS zawm lo damdawi-inte chu a khuahkhirh ṭan. 

Sorkar hian mipui tana ṭha ber tura ngaiin MSHCS a duang a; nimahsela private hospital ṭhenkhatin an zawm ve lo a, heng zingah hian Mizorama damdawi-in ṭha ber ber zinga mite an tel. Sorkarin tun hnaiah sorkar blood bank aṭanga thisen pek chhuah chungchangah MSHCS zawm ve lote hi a hrêk ṭan deuh niin a lang a, hei hian nghawng thui tak a nei chho dawn niin a lang. 

Sorkar hian a thuawih damdawi-inte hi a duat bik a nih chuan a dik thlap a, a duat theihna kawng hrang hrangah hamṭhatna siamsak se thil inhmeh tak a ni ang. Mahni thuzawm duhtu leh zawm thei lotute chungah sorkar hian duhsakna a lantir deuh a nih pawhin a lehlam hi vui tur an ni kher awm lo e. 

Chutihlaiin blood bank aṭanga thisen pek chhuah chung­changah hi chuan MSHCS zawm duh lote lo hrek chiam mai hi thil fel ber a ni lo thei a, thisen mamawhtute chunga harsatna siamna a ni a, a nihna takah chuan Mizoram chhunga damlote thoin an tuar a ni. 

Private hospital neitute hi thisen ma­mawhtu an ni lo a, a mamawhtu chu damlote an ni. An damloh inenkawlna senso sorkar-a ṭhin let loh inhuam a, MSHCS zawm lotu private hospital pantu damlote hian sorkar hi an chhawk zangkhai zawk a nihna lai a awm a, an thisen mamawh lo hrensak zawnga sorkarin hma a la a nih chuan a ngaihtuah nawn leh ngei a ṭul ang.