Inhnialna tur oil palm

Sorkar laipui chuan India rama oil ei chi a tam thei ang ber siam chhuah tumin National Mission on Edible Oil-Oil Palm (NMEO-OP) a kalpui dawn a, hemi atan hian cheng vaibelchhe 11,040 vel an dah. Mizoram pawh ram hectre 2,000-a oil palm ching turin sorkar laipui lamin target an rawn siam a ni.

Oil palm hi Mizo­ramah chin a lo ni tawh a, a tira sawi hmuhtu lamin an sawi kim loh vang pawh a ni thei ang, a chingtu tam takte beisei a phak lo hle. Tunah hian oil palm hralhna hi kalpui a la ni reng a, kan ram chhungah ngei an lei reng chung hian a chingtu tam tak hian a hlawkna an tel lo a, hlawkpui chu sawi loh mi tam takin an oil palm hmunte tichereuin thil dang chinna atan an hmang tawh a ni.

Oil palm hi Asia chhim-chhak ramah hian an ching uar ṭhin hle a; nimahsela a ram leilung, sik leh sa leh tui hna thlenga a tihbuai nasat avangin tunah hi chuan a duh lotu an tamin hmun tam takah chuan tihtawp a ni tawh. Oil palm aṭanga sum hmuh chhuah hi hlawk viau mah se thil dang a tihchhiat nasat avangin sawisel a hlawh a, lei a tichhia a, ram a tichereu a, tui hna a tikang a, khua a tihlum belh bakah nungcha tam takin an thih phah bawk niin mithiamte chuan an sawi.

Hetihlai hian India chuan oil palm aṭanga siam hriak leina atan sum tam tak a sen avangin India ram chhungah ngei oil palm hmunpui siam a ni. Hmarchhakah hectre nuai 3,28-a zauah oil palm chin a tum a, India ram hmun dangah hectre nuai 3.22-a zauah chin a tum thung. Tun hnai­ah Hyderabad com­pany lian 3F Oil Palm company chuan Assam leh Arunachap Pra­desh-ah kum nga chhung atan oil palm-ah cheng vaibelchhe 1,750 invest an tum thu an puang a, a duh lotu an au chhuak ve mek bawk.

Kan hma lawkah Mizoram pawh fiahin kan awm dawn a, sum nen min rawn dawrin chumi atan chuan kan ram tichereua tichhe thei oil palm ching turin min thlem dawn - kan duh lo chung min chintir theiin a rinawm lo a, kan duh dawn nge kan hnar ngam dawn tih mipuiin an lo thlir reng ang.