Lungleia RTPCR

Gauhati High Court thupek angin Mizoram sorkar chuan Lungleia RTPCR khawl bunna tur laboratory chu a buaipui mek a, an peih fel hnai tawh niin YMA Sub Headquarters, Lunglei hruaitute chuan an sawi.

Lunglei khawpui leh RTPCR chungchang sawi hi a tawp hleithei lo a, a bul ṭan danin a zir loh vang a ni thei. Sorkar dawnsawn danin a zir loh vang a ni thei a, mipui hriselna aia politics-a thil kalpui a nih tak vang pawh a ni thei awm e.

Congress MLA-in RTPCR khawl a pek chu an dawngsawng ṭha duh lo zet a, a dahna tur endik tura Health department tirh mithiam rual chu a tirtute vekin mithiamah an pawm lo leh a, chumi hnuah High Court lama zualko an awm hnuah tihluihnain RTPCR khawl hi bun a ni dawn ta a ni ber mai.

RTPCR khawl hi chhim lamin an mamawh ve lo angin kan sorkar lam chuan an sawi duh hial a, a state pumin laboratory pakhat inhman ṭawm renga kan awm hnuah tun hnaiah IBDS hnenah an mobile RTPCR van hawhte kan dil leh chuk chuk a, district zawng zawnga RTPCR laboratory din a tum thute kan sorkar chuan a sawi leh lawi si a ni.

Engpawhnise tun hnuah mipui hriselna ngaihthah lutukna hi politics thil avangin thleng tawh lo ila, chhim mipuite hriselna aia politics dah pawi­mawh zawk anga thil awm hi a pawi a ni. He thil hi inhmuh chhuahna atan sorkar hian hmang se, mipui thlan tlin an nih te hi hre nawn fo se a ṭha ang.