Ṭhalaite tana hmathlir

Mizoram Youth Commission (MYC) chuan, Mizo ṭhalaite'n rimawi leh zai hmanga eizawn­na tlak an neih theihna tur leh chawikanna turin tun hnai khan Music Connect Asia nen thawhdunna thuthlung an ziak.

Tun hnaia MYC lamin an huang zauha hma an lakna hi thil lawmawm tak a ni a, Mizo ṭhalaite tán rah ṭha tak chhuah ngei se a ṭha ang.

Mizote hi mahni induhtawk tak mai kan ni a, mahni kan inawm tlei a, hnam dang hi kan pawh tawk lo a, kan chenna India ramah pawh hian hnam dang nena intlawh pawh lo pawl tak kan nih hmel a - hei hian rimawi khawvela eizawnna kawngah kan ṭhalaite kawng a tibuai thui hle a ni.

Ṭawng kan thiam loh piah lamah hnam dang Vai kan tih maite culture kan hre lo a, an duhzawngte kan man lo bawk. Hmarchhak hnam dangte hi chuan keini aiin Vai kan tihte hi an hnimhnai zawkin an ṭawng leh hnam nun pawh an man thiam zawkin a lang a, hei hi rimawi lama eizawnna atan a ṭangkai hle a ni.

Zai ngaina leh zaithiam hnama inchhal ngam khawpa talent nei ṭha kan ni chung hian khawvel huapa lar chu sawi loh kan chenna India rama sum tamna Bollywood pawh kan la luhchilh phak lo a, kan zaithiamte pawh kan ram chinah kan la tawp a ni deuh ber.

MYC inremna siam thar hian Romawi lamah bung thar min kaipui se, Mizo ṭhalaite tán eizawnna kawng hawng ngei se a duhawm hle.