Campaign hun tawp rualin Tuirial Bial chhuahsan ni se

Tuirial bial aṭanga bye elec­tion neih tur chu October 30-ah vote thlak a ni dawn a, November 2-ah vote chhiar a ni ang. Vote thlak tawp hun aṭanga chhiar leta darkar 48 thleng campaign hun hawn ni ṭhin chu darkar 72 a pawh sei a nih tak avangin campaign hun a tawi ta sawt a ni.

Tun hnaiah social media lamah political party pakhatin Tuirial bial bye-election-a atana 'detail­ment' an siam chu social media lamah a darh chiam mai a, chutah chuan an party mi langsar tak takte chu, 'Tlawmngai taka vote thlak ni thlenga ṭhutchilh tura beisei an ni,' tih a inziak bawk. He thu hi a dik a nih ngai chuan Mizoram sorkara minister leh MLA 16-te chu Tuirial bial khaw hrang hrang 13-a vote thlak ni (October 30) thlenga ṭhutchilh tura tih an ni.

He party inruatna hi social media lamah a darh ta a ni mai a, a darh ve lo political party dangte hian eng ruahmanna nge an neih hriat a ni lo a, danin a phalsak piah lama tlawmngaia khaw hrang hrang ṭhutchilh tura ruat an lo awm a nih chuan anni pawh an inthiarfihlim ran a ṭha ang. Hei hi Mizoram People Forum lam pawhin ngun takin lo en se, inthlan vote thlak hun tawp October 30 tlai dar 6 aṭanga chhiar leta darkar 72 chu October 27 tlai dar 6 thleng tihna a nih hmel a, he mi hnu hi chuan Tuirial bial mipui ni lo campaigner-te chu bial chhuahsan vek tura hrilh an ṭha hle ang.

He mi kawngah hian political party zawngin campaign hun an neih te ṭha takin hmang ṭangkai se, an thiam leh theihna angin dan hnuaiah campaign tlang se la, chumi piah lama a hmun ṭhulhchilh leh vote thlak ni thlenga awm hi dan bawhchhiatna a nih tawh avangin October 27 tlai dar 6 hnuah chuan Tuirial bial pawn mipuite chu anmahni khaw lama haw tuirin thuneitu lam leh MPF lamin tir haw vek se a ṭha hle ang.

Party bik thliar loin dik takin dan hi kenkawh ṭhin ni se, tun hmaa inthlana ṭawngkam mawi lo tak 'last minute' an tih ang chite pawh hriat nawn a nih tawh lohna turin Tuirial bial pawn mipuite chuan vote thlak tawp aṭanga chhiara darkar 72 hma lamah bial an chhuahsan vek tur a ni ang.