Kan buaina ngai Bru bawk

Tripura-a awm mek Bru mi ṭhenkhat Mizorama vote neite chu Tuirial bial bye-election neih turah Tripura-a vote an thlak theihna tura hmala leh ruahmanna siam political party an awm thu Central YMA chuan an sawi a, Mizoram pawna vote thlak hi an rem tih loh tur thu an sawi.

Hun rei tak chhung Mizoram inthlan apianga kan buaina pakhat chu Mizorama awm ṭhin Bru mi ṭhenkhat, anmahni duh thu ngeia Tri­pura lama pem ta, Mizorama vote la nei tlat site vote thlak dan chungchang hi a ni. Vawi eng emawzat chu Tripura-a an khawsakna bul hnaiah vote thlaktir an ni tawh a, Mizoram chhunga vote thlakna bik tur siamah lirtheia hruaiin vote an thlak tawh bawk a, inthlan a rik rualin anni hian buaina leh harsatna min thlen ziah a ni ber mai.

Tunah chuan heng Bru-te hi Tripura-a inbengbel turin sorkar laipui lam pawhin thutlukna a siam fel tawh a, chutihlaia Mizorama vote an la nei reng pawh hi a ngaimawhawm tawk tawh a, chumi piah lama Mizoram chhung inthlannaa Tripura-a vote thlaktir dan ngaihtuah hi chu thil ṭul lo tawp a ni. Tripura state chhunga Tuirial bye-election vote thlak dan dap an awm a nih chuan a state puma kan do a hun a, hei hi kan tihtawp nghal a ṭul hle.

Hei mai hi ni loin Tripura-a awm nghet tawh tur Bru mi ṭhenkhatin Mizorama vote an la nei hrim hrim hi a ngaimawhawm a, heng mite Mizoram electoral roll aṭanga paih tura kan nawr laia kan nawr nat tehlul nen inthlan thawm a reh hi chuan kan chawlhsan leh deuh vang vang ṭhin.

Kum 2023 MLA inthlan hma ngei hian inthlan a awm dawn apianga kan buaina Bru-te hi electoral roll aṭanga paih ni ngei tawh rawh se.