Anthurium Festival leh sum

Mizoram sorkar chuan nimin khan Virtual Anthurium Festival 2020 a buatsaih a, a hawngtu chief minister chuan, sorkar laipuia Ministry of Tourism-in festival hman nan kum tin Mizoram sorkarah sum a pe ṭhin tih sawiin, "He sum hi thil dang atan hman theih a ni lo a, Mizoram tourism chawikan nan kût huaihawt ngei ngei turin min ti a ni," a ti a; kuminah state dangin festival huaihawtna tur sum an dawn loh laiin, Mizoramin a dawng a, festival hman theih a ni tih a sawi. 

State dang pawhin sum an dawn loh laia Anthurium Festival aṭanga Mizoramin sum a dawng thei bik hi thil lawmawm tak a ni a, heti taka India sorkarin Anthurium Festival an rawn ngai pawimawh ta bik erawh thil mak tak a ni. He festival atana senso hi sorkar laipui pek vek a ni a, Mizoram sorkar sum a hek lo a, state dangte mithmuha Mizoram pho chhuahna remchang ṭha tak a ni bawk ang. 

Hetihlai hian thil hi a hun leh hmun a awm ṭhin a, ramri buai avanga kan bungrua leh nitin mamawhte Lailapur-in an dan ṭhup lai, Covid-19 avanga ramin harsatna a tawha sorkar hnathawk pawhin hlawh an lak mumal theih loh lai, miretheite retheihna belhchhaha a awm mek lai leh Pathian be tur pawha kan inkhawm theih lohlaia 'sum a awm' theih vanga kût hi a ṭul ngang a nih hmel a, sawiselna ri a ring hi a mak lo. 

Kut buatsaihtu lamin a kuta fak mawi mai loa insawifiahna an nei tel zel leh, a sum lo kal dante chipchiar taka an sawi chiam avang hian anni lam pawh hi an inthlahrung a ang a, mipui phei chu an hmin lo hle tih a lang chiang. Hetiang taka hun harsa - hri leng, mamawh lâkna kawng ping, pawisa van avanga mirethei an rum laia kut 'hman ngei ngei ngai' hi chu thil inhmeh lo tak a ni. 

Mipui nawlpui hian he kut hi 'virtual' ang pawh ni se hman a la hun lo niin an ngai a, 'sum a awm' tih vanga kan hmang mai hian miretheite retheihna leh mipui nawlpui tawrhna sorkarin a ngaihsak lo hle tih a lantir thei ang. Sum chu lo awm eng ang pawh ni se, ramriah buaina a awm a, hri leng avanga kan buai bawk avangin, "Kumin chu kan hmang rih lo mai ang e," ti ngam zawk tura ngaihten state dang pawhin sum an dawn loh laia kan dawng 'bik' chu nihlawhnaa ngaia kan aupui hi chu a zialo hle a ni. 

Sum a awm phawt chuan, hri leng leh ramri buai karah pawh remchang awm thei dap chawpin kan kut lui zel a nih hmel a, "Sum leh kut nge kan ngaih pawimawh kan ram dinhmun" tih hi mipuiin sorkar an zawt mek a ni.