Tourism project chhui a ngai
Tourism minister chuan tun hnaia Lungdaia a campaign-naah thu sawiin, Sakawrhmuituai tlanga skywalk project leh Chaltlang leh Durtlang inkara ropeway siamna atan hnathawh hmaa cheng nuai tam tak kum 2018 hmaa release tawh ni si, hnathawh hmuh tur awm mumal lo a nih vangin Lokayukta emaw, CBI emaw kuta pek mai an ngaihtuah mêk thu a sawi.
Hei hi chhangin Congress party chuan he project hi chhui ngei se an duh thu an sawi a, Skywalk project hi MNF sorkar hnu kum 2019 thlengin thawh a la ni a, May 14, 2020-a tihchhuah Tourism e-Book ah pawh sorkar hmalakna kal mek anga ziah a nih thu leh, a project khaihlak chhan chu a changtu minister-in a hriat chian ber tur thu an sawi ve thung.
He thil hi cheng nuai 1,000 chuang awmna project a nih angin inthlan dawna sawi chhuah leh inchhan mai maia tawpsan chi a ni lo, chhui chhuah ngei a ṭul. Kan ram hian tourism-ah theihna sang tak kan neih thute sawiin sorkar laipui aṭang pawhin project lian tham tak tak kan nei ve tawh ṭhin a, hlawhtling loa hlamzuih ta hi a awm leh ṭhin. He project pahnih hi a hlawhtlin ngei theihna atan bawhzui vat a ṭha ang.
Tourism department hnuaia project lian tak pahnih chungchang, kum 2018-a sorkarna vawnfung chelhtu berin a ngaiah bopui vang vang hnua Tuirial bial bye election hma lawka Lungdaia a han sawi chhuak chauh mai hi a project hlawhtling lo veina lam aiin politics-a hlawkna um a ang lek lek zawk, chutih rualin a sawi anga thil dik lo a awm a nih ngei chuan chhui chian ngei a ṭha a, CBI kuta hlan tham khawpin sum chingpen nia a sawi hi a tam tham bawk a ni.
Congress lamin an sorkar laia thil thleng hi MNF sorkar hnuah pawh an thawk zui, tih huai taka sawiin chhui an duh thu an lo tuihnih ve bawk a. He thil hi a chhui duh lo an awm lo bawk a, a pawisa awm zat a tam tham bawk avangin chhui ngei a ṭha ang.
Project kal tlang pui theih loha a awm chhan leh, a nihna dik tak pawh hi hai lan ni se; sum tam tak senga bul ṭan tawh he project lian tak hi chhunzawma zawh ngei ni rawh se.