Campaign hun a tawp ta

Tuirial biala bye-election neih turah October 30-ah vote thlak tur a ni a, vote thlak tawp hun aṭanga chhiar leta darkar 48 thleng campaign hun hawn ni ṭhin chu darkar 72 a pawh sei a nih tak avangin October 27 tlai dar 6 khan campaign hun chu a tawp ta a ni.

Tuirial bialtu MLA Andrew Thangliana chu vanduaithlak takin a boral hlauh mai a, hei vang hian a tlinna bial chu bial ruakah puan niin inthlan ṭhat buatsaih a ṭul ta a ni. He inthlan atan hian candidate pali an awm a, an zavai hian tlin inbeiseina sang tak an nei ṭheuh niin a lang.

Dan naranin term laklawha inthlan ṭhat a awm hi chuan ruling party hi an chan a ṭha deuhah ngaih theih a ni ṭhin a, tun ṭum bye-election hi a dan a dang deuh a, party tin mai hian tlin an inring hle niin a lang. Hei hi an campaign dan zia leh thu leng vak aṭang pawhin a hmuh theih. A tu pawh hi tling se an sang fâl viau lo mai thei a, a bikin candidate pathum hi chu inthlau vak lo tura ngaihna a lian hle.

Hei vang hian dik leh felfai taka inthlan kalpui hi a ṭul zual a, he bialah hian sorkarin dan chhunga a pawm theih loh thil kalpui loh ni se a ṭha hle. Inthlan campaign laiin sum leh therhlo sema inpuh tawnnate a awm a, hei hi chu inthlan apianga political party-te inpuh tawnna a ni ṭhin a, sorkar thuneitute leh Mizo People Forum (MPF) lamin an en zui a ṭha hle ang.

Tuna thil pawi­mawh ta ber chu campaign hun a tawp tawh avangin tumah campaign chhunzawm tawh lo se, bial pawn mite pawh Tuirial bial chhuahsan vek se a ṭha ang. Hei hi MPF lam pawhin khauh takin bawhzui thei a lawmawm ang. Mizoramah inthlanna kan neihte dik leh thinghlim tak a awm rualin sawi neuh neuh tur hi a awm ve leh ṭhin a. Tuirial bial bye-election-ah hian campaign hun tawp tawh hnua thil thleng a awm lohna turin political party tinte pawh insum se, bial pawn mi zawng ṭha takin haw se, MPF lamin ngun takin vil bawk se. Inthlanna thianghlim tak neih theih ni se a duhawm hle.