Hripui vei hmuh chhuah a tlahniam

Tun hnaiah Mizoramah Covid-19 hripui vei hmuh chhuah a tlahniam ve zel a, hun rei tak chhung nitin mi 1,000 chuang hripui vei hmuh chhuah a nih hnuah tun hnaiah 1,000 an tlin lohna a rei deuh ta.

Tun ang zela kan kal chuan state dangte ang bawkin hripui vei hi kan tlahniam hret hret thei dawn a nih hmel a, thil lawmawm tak a ni. Hripui leng avang hian mi tam takin nunna an chân tawh a, chumi piah lamah chhungkaw tam takin eizawnna an chân tawh bawk a ni. Kan ṭhalai eng emaw zat state pawna hnathawkte thawk chhunzawm thei loin an awm a, Mizoram chhungah pawh eizawnna ngai chhunzawm thei lo tam tak an awm bawk a ni.

He hripui hian sorkar pawh a tibuai a, sum leh pai tam tak sen belh a ngai a, tha tam tak a sen a ngai a, hun tam tak sen a ṭul bawk. Kohhran a tibuai a, zirna a tikhaihlak a, chumi piah lamah chuan kan khawsak phung hi nasa takin a thlak danglam tawh a ni. He hripui hlauhawm leh chimawm tak laka kan inven theihna mithiamte sawi chu hmai tuamna (face mask) vuah ṭhat a ni a, thil harsa nia lang lo hi a zawm kan harsat tlat hi thil mak tak a ni. Hripuiin harsatna min thlen nasat dan en hian, chu hripui laka kan invenna mithiamte sawi hi zawm hram hram theih hi se a lawmawm ngawt ang.

Hri hlauhawm tak anga lang lem lo, a tuar na deuhte nunna laksak thei lawi si, khawvel kalphung tibuai rup thei khawpa min tibuaitu a nih vangin hian hripui laka kan him zel theihna tura mithiamte thusawi hi zawm ṭha ila. Hmai tuamna hmang ṭhain hripui vei kan tlakhniam zel theihna turin kan zavaiin i ṭang tlang zel ang u.