Tuirial bialah mipuiin zalen takin duh thlang se

Vawiin hian Tuirial bial chuan an bial enkawltu tur MLA an thlang dâwn a, tlai dár 6:00 thleng vote thlak theih a ni ang. He inthlan atan hian political party paliin candidate an siam a ni.

Tuirial bial in­thlang tur hi politics lam ngaih­ven deuhte chuan ngaihnawm an ti hle a, a chhan chu eng party can­didate pawh hian tlin beiseina an neih ṭheuh vang niin a lang. Inthlan ṭhenkhatah chuan a hming maia tlin an inbeisei thu sawi a, a taka tlin beiseina nei vak lote pawh an awm thei. Tun ṭum Tuirial bialah bîk hi chuan tlin beiseina nei lian tak vek niin a lang.

Engpawhnise tuna pawi­mawh ta ber chu mipuiin an duhthlanna zalen tak hmanga vote an thlak theih hi a ni a, chumi tibuai thei thil engmah thleng lo se a ṭha ber. Campaign hunlai chuan inpuh tawnna hrang hrang leh chanchin ngaih­nawm lo deuhte pawh awm ve bawk mah se, mipuiin duhthlanna dik tak nena zalen taka vote an thlak theih hi a pawimawh ber.

Tuirial bial mi­pui­te'n zalen taka vote an thlak theih­na turin bial pawn aṭanga zar buaitu awm lo se. Political party hrang hrangte pawh insum tlâng se, Tuirial bial mipuiten an MLA atana an duh ber zalen takin thlang se, vote nei zawng zawng pawhin vote thlàk ṭheuh se a ṭha hle ang.