Sorkar zu do dan a pawnlang em?

Mizoram zu khapna dan Mizoram Liquor (Prohibition) Act, 2019 hman mek a ni a, he dan hnuaiah hian zu sak, lakluh leh in khap tlat a ni. He mi hma hian Mizoram Liquor (Prohibition and Control) or MLPC Act, 2014 hmangin Mizoramah kum li chhung dan hnuaiah zu zawrh a lo ni tawh a ni.

Zu zawrh leh zu khap bur chung chang hi Mizoramah chuan khawtlang thil mai ni loin politics thil lian tak a tling a, tuna rorelna vawn fung chelhtu MNF hian zu khap bur an intiam a, a hmaa Congress hunlaia zu zawrh chu ṭha an tih loh thu an tlangaupui bawk a ni.

Kum 2018-a thlan tlin an hnih hnuah rang takin zu zawrh an titawp nghal a, zu khap burna tur dan thar siamin kum 2019 May-ah Assembly-ah an pasa hman hial a; phai lam chanchinbuin an kawm­naah Excise & Narcotic Minister chuan chhuang takin Mizoramah zu a awm loh thu (completely dry state) a sawi lang nghe nghe a ni.

Kum 2018-a sorkarna an chan hlimin sorkar mi leh sate zu dap turin an tir chhuak mai lo a, minister hoin Rangvamual leh a chhehvel an fang a, minister leh MLA bengvar midangte'n ṭawiawmin a state pumah na takin zu kan do a ni. Tunah erawh chuan Mizoram hmun hrang hrangah dan loa zu zawrhna a tam leh ta hle a, dan bawhchhetu tam takin zu hmangin sum an siam mek a ni.

Aizawl chhehvela zu hmun­pui nia an sawiahte chuan zalen angreng takin zu an sain an la zuar reng thei a, Rangvamual leh a chhehvelah zu leh ruihhlo rui ṭhalai ualau takin kawngpui kamah mai pawh hmuh tur an awm ṭhin a ni. Heng mite leh midangte'n khawpui chhunga zu an lalut tur hi Vaivakawn chhungah police lamin an lo dap ṭhin a, lirthei tlante tidingin chhun zan zawmin an duty a ni deuh ber.

Hetihlai mek hian a thlang lawkah chuan zalen taka zu lei tur leh in tur a awm reng a, kawngpui kam maiah pawh ualau takin zu hi an in tho.

Sorkar hian zu hi a duh loa a khap duh tak tak a nih chuan ṭhalai zu in lo thei lote'n an lei tawh sa mansak duhtawk mai lo hian a zuartute kut aṭanga man ngei turin ṭan la ngam zawk se. Zu sakna hmunpuite pawh nitin uluk takin vilin check ṭhin se; tuna Rangvamual leh a chhehvela kawngpui kam china sorkar zu khap dan leh zu do dan hi chu a pawnlang lutuk deuh lo maw?