Thlan tlinah i lungawi ang u

Vawiin hian Tuirial biala by-election neiha vote chhiar a ni dâwn a, chawhnu lamah chuan he bial enkawltu tur MLA thar hi a hriat tawh ang.

Vanduaithlak takin he bial viltu MLA a thih avangin Tuirial bial­ah hian inthlan ṭhat a ngai a, political party paliin candidate neiin an zinga pathum hi chuan tlin an inbeisei vek niin a lang. Tlin an inbeisei tlan dan aṭanga thlir hian an vote hmuh zat pawh hi a inthlau vak dâwn lo a ni mai thei a, engpawhnise tunah chuan inrinsiak hun a tawp tawh a, a tling tur hriat a ni mai dâwn.

Dan ang thlapa inthlanna kalpui a nih tawh hnuah hi chuan thlan tlin apiang pawm thiam a pawimawh a, a tling zo ve ta lote pawhin an tling ta lo tih an inpawm a ṭha hle. Kan politician senior zingah tlin loh chhuanlama Electronic Voting Machine an khawih chingpena puh duh tlat mai te, lehkhathiam lo zawk leh hre lo zawkte rilru hruai sual thei tura chhuanlam awmang lo pui pui siam chingte kan awm a, a pawi hle a ni.

Tuirial bial inthlanah hian candidate te pawh an ṭhalaiin thil awm dan thlir thiam rual pawh an nih hmel a, a tling ta lote pawhin chhuanlama mipui hruai sual thei phuahchawp mai mai tawh loin an chak loh pawm thiam se. Thlan tlin pawh thiam tak leh puitling takin awm se, mipuiin dan anga an thlan chhuah MLA hi chu tute pawhin thiam taka pawm hi a ṭha ber ang.