Tuirialin MLA thar a nei ta

Tuirial bialtu MLA a boral avanga inthlan ṭhatna chu tluang taka neih a ni ta a, vote chhiar zawh tawh niin MNF candidate K Laldawngliana thlan tlin a ni.

Inthlan hi chuan boruak lian tak a ken tel avang hian campaign hunlaiin na tak taka inbeih chang a awm a. A chang chuan dawt ngialngana inbeihte leh inhmuh thiam loh hlen theihna ang hiala ṭan ulhte pawh a awm ṭhin. Tuirial bial inthlang tur campaign thawm pawh a ṭha hle a, kum 2023-ah mai state puma inthlan hun a nih mai dawn avangin political party lam pawh an ṭang a, an vote zawng au thawm leh an khingpuite an beih dan boruak pawh a sang hle.

Heng zawng zawng hi tunah chuan a hun a lo zo ta a, tluang taka vote thlak a ni tawh a, vote chhiar zawh ni tawhin Tuirial bialin MLA thar an nei ta.

Covid-19 hripui kara inthlang an nih avangin ruahmanna siam thiam pawh a harin a hautak dawn a, hripui veite tana vote thlak hunte hial pawh a hranpaa siam a ṭul avangin tluang taka inthlan zawh fel a nih theihna tura thawktute an fakawm hle a ni.

Political party lam pawhin ṭan an la nasain theihtawp an chhuah a, tunah chuan mipuiin an duh ber MLA an thlang chhuak tawh. Bial mipuite'n party inbeihna leh inelna boruak dah ṭhaa Tuirial bialin hma a sawn theihna turin MLA thar hi thawhpui thiam tum se. MLA thar pawhin inthlan dawna a intiamnate tihhlawhtlin turin ṭan la nghal se, Tuirial bialin MLA thar an neih hi Zoram mipuite pawhin an lawmpuiin duhsakna an hlan ngei ang.