Kang ṭhelhna man to

Kumin April thlaa Lunglei leh a chhehvela kang mei chhuak ṭhelh turin Mizoram Chief Minister chuan Indian Air Force hotute ngenin anni hian helicopter hi an rawn tir a; helicopter chah chhuah man leh a pilot-te senso Rs 14,11,221 chu Mizoram sorkarin a pek a ngai dawn ta a ni.

IAF helicopter chah chhuah a nih hlim hian political party lamin Chief Minister chhuanawm an tih thu uar taka sawiin MNF Lunglei sub headquarters chuan, "Lunglei leh a chhehvel kang ṭhelh tur, IAF chopper chah chhuak thei Chief Minister leh a thawhpui MLA leh minister ṭha tak tak kan nei hi a vanneihthlakin a thlamuanthlak kan ti hle," an ti. MNF general head­quarters chuan, "Chief Minis­ter chak tak leh thiltithei tak hmalakna avang liau liaua tihhlawhtlin a ni hi mipui hriat­ah MNF-in kan puang a ni," tiin thu an chhuah a, CM leh IAF-te inbiak chhoh dan kimchang thlengin an chhuah a ni.

Lunglei lama kang mei chhuak ṭhelh dan political party lamin an dawnsawn dan leh an puanzar dan en mai hi chuan ram hruaitu remhria leh chak bik neih avanga IAF hi ko chhuak thei bik kan ang hle a; nimahsela tun hnaia Deputy Director Account, Air Headquarters, Delhi lamin cheng nuai tam tak mai Mizoram sorkar hnena an rawn ṭhing ta hian Mizo mipuite a barakhaih hle ang. Ram hruaitu chak takte hmalakna fing tak hi man chawia 'hire' ang lek a ni ta mai emaw tih mai a awl a, an hnahtawhte hi cheng nuai 14 senna thamah mipuiin an ngaih leh ngaih loh pawh zawh tham a ni ang.

Engpawhnise kang mei chhuah vanglai leh mangan­laia van sang aṭanga kang ṭhelh thei helicopter chah chhuah kha chu thil lawmawm tak a ni phawt mai. Helicopter lo thleng kan VIP-te'n thla an lakpui hial danah pawh khan a hunlaia a thlamuanthlak dan leh a hlutzia a tilang. Tuna kang ṭhelhna bill lo thleng ta si aṭanga chhut hian kang ṭhelh man hi a tam em em a, hei vang hian ram tikang lo turin Mizo mipuite kan invena kan ṭan tlan a ṭul takzet a ni.