Vawk vulhtute manganna

Mizoramah vawk pul hri (African Swine Fever) avangin vawk 30,000 dâwn an thi tawh a, hengte avang hian Animal Husbandry & Veterinary department chuan ASF chu chhiatna lian tham thlenga (calamity) puang turin Disaster Management & Rehabilitation department-ah dilna an thehlut a, State Disaster Response Fund (SDRF) lama sum awmte hman an dil. Hetihlai hian DM&R lam chuan sum indaih lohna a nasat avang leh, Covid-19 hripui avanga sum hmanna a tam bawk si avangin ASF chu calamity-ah puan theih a nih loh thu an sawi.

AH&Vety depart­ment hotute hian vawk pul hri avanga mipui tawrhna hria in theihtawp an chhuah a, sorkar laipuiah chhawmdawlna awm thei ang angte an dil a; nimahsela tun thlengin hlawhtlinna lian tham sawi tur an la hmu lo. Hei vang hian state sorkarin chhiatna thlenga sum hman tur a neih sâ SDRF aṭanga pawh mai dan an dap a, nimahsela hei hi thil tih theih ni dawnin a lang lo.

State sorkar hotu lam tán thil thlen dan hi a luhaithlak hle dâwn tih a lang reng tawh a, hun pangngaiah pawh sum thawh chhuah nei lo state kan nih angin sum indaih lohna a nasa sâ tawh a, tun hnaia hripui leng hian sum lama harsatna a belhchhah ve leh bawk a ni.

Hetihlai mêk hian kan Chief Minister leh Finance minister ni kawp hian state sorkar budget neih hi chu duh anga hman theih a nih thu ṭawngkam thiam takin a lo sawi tawh a, 'Kan duh chuan kan kang thei a, kan duh chuan kan bai thei' tiin a lo sawi tawh. Vawk vulhtute harsatna tawh hi a len em avangin Finance minister hian kan budget-a sum ṭhenkhat hi chhawmdawlna atan han 'bai' thei hlauh se vawk vulhtute lawmna hi a säng hle ang.

Chumi piah lam­ah chuan sum harsat chhanah hian Covid-19 puh hi a awlsam a, hripui leng avanga chhawmdawlna pek chhuah kawngah Mizoram budget-a sum awm sâ hman a la ni lo niin a lang a, hetihlai hian ṭum danga a dâwn ngai loh ṭanpuina sum hi mipui, pawl, kohhran leh sorkar laipui aṭang pawhin ṭhahnem tham tak a dawng. Sum harsat chhana hripui leng puh vek pawh hi a dik kim lo ve palh thei a, kan sorkar hian vawk vulhtute harsatna hi a ngai pawimawh tak tak a nih chuan khawi aṭangin emaw chhawmdawlna hi a pe ngei tur a ni.