Rt-PCR khawl bun harsat sorkar?

YMA Sub Headquarters Lunglei chuan Lungleia RT-PCR khawl bun tur chungchangah Mizoram sorkar chu tun kar chhung an ngaihchan tur thu leh, hmalakna a awm loh chuan November 8-ah Lunglei khawpuiah total bandh huaihawt an rel. Hemi hnu hian Finance department chuan Rt-PCR khawl bunna tur hian cheng nuai 30 a pek chhuah thu Finance depart-ment aṭangin YMA Sub Headquarters kaihhruai pawl hrang hrang hruai­tute chuan thu an dawng.

Lunglei khaw­puiin RT-PCR labo­ratory tun thlenga an la nei lo hi thil mak tak a ni a, a khawl ber an dawnna a rei tawh piah lamah High Court meuhin khawl hi bun ngei turin thu a lo pe tawh a, tun thlenga hmalakna a kal muang lutuk hi chu chhim lam mipuite ngaihthahna a ang lek lek mai. He khawl bun tur hian a khawl petu lam ngaihtuah a hun tawh lo a, Covid-19 hripui leng avanga Lunglei mipuiin an khua ngeia RT-PCR laboratory an mamawhna lam hi chhût zawk tur a nih hmel.

RT-PCR laboratory dinna tur kawngah hian sprkar tan pawh harsatna awm thei thil tam tak a awm a, chumi ni lo harsatna siam chawp zawkin he khawl bun hun hi a tikhawtlai niin a lang. Mizoram sorkar ngeiin 'mithiam' tia Lungleia khawl bun theih dan tur ngaihtuahtu mithiam rualte chu a tirtute bawkin mithiam an nih loh thu an sawi a, hei hi chu a mithiamte zah lohna piah lamah Lunglei mipuite zah lohna rawng kai a ni thei hial awm e.

Tunah chuan sorkarin a duh leh ṭul a tih vang lam ni loin, mipuiin an nawrna avangin High Court-ah an nawr chêp tawh a, Court thupek pawh an bawhzui hmanhmawh lo hle niin a lang a; nimahsela YMA kaihhruaia pawl hrang hrangin total bandh an tintuah meuh chuan pawisa pawh a awm chawpchilh ta mai niin a lang. A pawimawh ber chu hri leng avang leh nakin zel atan Lunglei mipuite hian RT-PCR laboratory hi an mamawh a, a rang thei ang berin sorkar hian bun rawh se.