Chhungkaw 50,000 chhawmdawl

Health minister chuan Covid-19 avanga harsatna tawk Mizorama chhungkaw 50,000-te chhawmdawl tumin sorkarin ruahmanna a siam a, sorkar laipui lamah an bawhzui mek tih a sawi.

Hripui leng avanga chhungkaw tam takin harsatna an tawh laia sorkar lamin mi harsate chhawmdawlna tur ruahmanna a siam hi thil lawm­awm tak a ni a, a puitlin hlan a nghahhlelhawm tawh hle a ni. He hripui hi a tuar na ber pawl state kan nih hmel a, kan in lockdown rei bik avangin miretheite retheihna a belhchhah a, a bik takin khawpuiah kum chanve aia tam sum lalut miah lo chhungkaw tam tak an awm hman hial a ni.

Mizoram sorkar lamin inkhung leh inkhuahkhirh rei hmanga hripui do a thlang a, vanduaithlak takin hripui leng thawhkhatnaa kan tih fuh kha a thawhhnihnaah chuan a lo fuh tawh lo a, mi tam tak eizawnna tibuaia kan inkharkhip chungin hripui len tamna leh a len reina state kan ni ta a, miretheite'n an tuar na zual hle a ni.

State sorkar aṭangin chhawm­dawlna sum an pe chhuak hleithei lo a, an pek chhuah chhunte pawh Chief Minister's Relief Fund lama mipui thawh khawm sa sum tho a ni tlangpui a, state budget aṭangin a hranpaa chhawmdawlna pek chhuah a ni lo.

Tuna chhung­kaw 50,000 tana chhawm­dawlna sum sawi rik a awm leh ta hi a lawmawm a, he sum hi pek chhuah theih a nih chuan tuna harsatna tawh vanglai tak hian a rang lama pek chhuah theih ni se, a sem danah pawh Village/Local Level Task Force lamte nena thawk tlangin langtlang leh fel fai taka sem ni thei se a lawmawm hle ang.