Vawk chânte ṭanpuina

Animal Husbandry & Veterinary (AH& Vety) minister chuan vawk pul hri African Swine Fever avanga vawk chânte hnenah zangna­dawmna pek theih dan an la ngaihtuah reng tih a sawi.

Minister chuan sorkar laipui lama scheme awm sa aṭanga hai chhuah tuma an beih dan a sawi bakah, Disaster Management and Rehabilitation (DM&R) depart­ment hnenah ASF chu calamity-a puang tura an ngen thu a sawi a, anni hian pawisa pe chhuak tura thuneitu SDMA kuta an thlensak thu a sawi.

Tun hnaia Mizoramin vawk pul hri avanga chhiatna a tawh hi a namen lo hle a, chhungkaw tam tak eizawnna a tlachhia a ni. A hlawm liana vawk vulha eizawng vawk chânte an khawngaihthlak ang bawkin vawk pahnih khat lek neia innghahna bera hmangtute pawh an lainatawm a, he vawk pul hri avang hian chhungkaw tam tak an rûm a ni.

Hei hi hriain AH&Vety department lam pawhin theihtawp chhuanin ṭan an la ve a, sorkar laipui lamte dawrin chhawmdawlna awm thei ang angte an dap sak a ni. Hei bakah hian state sorkar aṭanga chhawmdawlna sum pek chhuah theih dan tur an ngaihtuah bawk a, vawk vulhtute harsatna tlem tala chhâwk zang­khai theih dan ngaihtuahin ṭan an la a ni.

ASF vanga harsatna thleng hi tute chet sual vang emaw, tute'n emaw an tih tur an tih loh vang lam ni loin he vawk hrileng hian min run ve a ni ber a. A do lêt a hautakin inven pawh a harsa a, hei vang tak hian sorkar pawhin a chhawmdawlna kawngah theihtawp chhuah se, vawk vulhtute tana zangnadawmna awm thei tur hi ngaihtuah zui zel se a lawmawm ang.