Zu khap burna hnuaia zu tam lutuk hi

Mizorama zu khapburna dan hman mek, Mizoram Liquor Prohibition (MLP) Rules zir chiang tura din committee chuan tunlai hian ngun takin rules an zir chiang mek a, ṭum hnih an ṭhukhawm tawh a ni. He committee-ah hian sorkar mi pawimawhte bakah pawl hrang hrang leh kohhran hruaitute an tel.

Mizoramah hian hun rei tak chhung inhnialna awm tawh zu khap bur duh leh khuahkhirhna hnuaia zu zawrh duh chungchangah hi chuan a tawn tawnin an in hmin tawn lo ve ve niin a lang a, tun thleng hian zu khap duh zawk leh zu zawrh law law ṭha ti zawk an la inhnial reng a ni. Tunah chuan sorkar hawi lam a chiang tawh a, zu khapburna chu kalpui a ni a; nimahsela Mizoram hmun hrang hrangah zu lei tur a awm reng mai leh 'zu hmun' tih tur khawpa zalen taka zu sakna leh zawrhna hmun a la awm hi a ngaimawhawm hle a ni.

Tun hnaiah Aizawl khaw daia Rangvamual leh a chhehvela zu an man danin social media hrang hrangah sawi a hlawh hle a, a zu zuar tak tak leh zu sakna hmun dap si loa zu lei tawh sa kawngpuia an lo mansak ṭhin avangin ṭhalai phun thawm a ring hle. Heng mite sawi ber chu zu zuartute zu mansak si loa zalen taka lei theih an lei tawh hnua an laksak leh lawi si hi a ni awm e.

Engpawhnise zu hi kan khap a nih chuan a kengkawh tura ṭan lak tur a ni a, tunah hi chuan Mizoram hmun hrang hrangah tual­chhung zu (local) leh state pawn aṭanga dan loha lakluh zu hi a zalen hle a, zu in mite chuan lei tur an hmu reng tho niin a lang.

Zu khapburna dan hmanna hnuaia zu lei tur awm reng hian sorkar a timualpho a; zu khaptu nih hming ṭhatna neitute hi khap hneh lo hming chhiatnain a umzui lohna turin sorkar a ṭan a ngai a ni.