Ambulance leh Recovery Van hawh theih

Transport department-in YMA Sub Headquartes, Cham­phai hnena ambulance leh lirthei hnuh chhuahna (recovery van) an hawhtir chu tun hnai khan Transport minister-in Champhai YMA hruai­tute hnenah a hlan a, minis­ter chuan heng an thil hawhte hi mipuiin an chhawr ṭangkai ngei a duh thu a sawi.

Sorkar lirthei khawtlang tana ṭangkai thei tura hawhtir hi tun hmain a awm tawh a nih pawhin thil thleng ngai zen zen lo a nih hmel a, chutih rualin ngaihtuahna ṭha tak leh ṭangkai tak a nih theih dan a awm. Sorkar hian lirthei kher lo pawh building te, khawlte leh thil dang hi man to tak takin a lei a, a enkawl kawngah harsatna tawkin a hun hmaa bothlau leh chhia a tam thei hle a, a hmang ṭangkai tur ngeite hnena hlan hi thil finthlak tak a nih hmel.

Sorkar hian hlawhtlinna (achievement) neih duh luatah sorkar tihâwm ni lem lo thlengin sorkar hminga tih zel tumna a nei lian hle mai a, hei hi Mizoram sorkar sum, tha leh hun tam tak khawhral tawhna a ni. A remchang leh theih ang chinah chuan sorkar hi chu remchanna siamsaktu leh mamawh ang tumsaktu (felicitator) ni mai se, a hmang ṭangkai thiam hnenah pe chhuak mai ṭhin se, ram leh mipuiin an chhawr chhung chu sorkar hlawhtlinna a ni tho tho ang.

Chuti ni loa eng­kim mai sorkar hminga kalpui vek tum luatah hian zawh loh nghawngkawl bah palh a awm thei a, sorkar building ṭhing ṭhiap ṭhuap hmuh tur a awm a, sorkar project bul ṭan ve ûka kalpui hleih­theih lohte kan hmu a, hengte hi ngaihtuah­na fing zawk senga a chhawr thiamte hnena hlan a ṭha hle ang.

Ambulance leh recovery van hawhtir hi an inhlan dan fel tak awmin an kalpui ngei turah ngai ila, Mizoram hmun dangah pawh kalpui ve theih tura duan ni se, mipui tan ṭangkaia luan chhuah zel hi sorkar tih tur chu a ni ang.