Plastic bag khap
Urban Development & Poverty Alleviation (UDPA) department chuan, Plastic Waste (Management & Handling) Rules, 2016 Rule 4-in a sawi angin, micron 75 aia pan sarâng hmanga siamte kawl, hralh, hman leh thil tuamna atana hman khap tlat a nih thu a tarlang a. Polystyrene leh expanded polystyrene (thermocol tia hriat) siam chhuah, chah luh, kawl, sem, hralh leh hmante pawh an khap. Dan bawhchhiate chu kum nga thleng tàntir leh Rs 1,00,000 thleng chawitir theih an ni.
Kum 2019 khan Aizawl Municipal Corporation chuan Aizawl hi 'Plastic Free City' tiin a lo puang tawh a, India rama smart city atana puan khawpui 99 dangte nen danin hman a phal chin bâk plastic bag hman phal lohna khawpui zingah puan tel a ni.
AMC-in hmalakna a puan hnu hian Aizawl bazar leh khawpui chhungah polythene bag kan tih mai ṭhin a vang hman hle a, uluk leh ṭha taka an vil chhung zawng chu plastic bag hi ualau taka hman zui a ni ta meuh lo. A vil zuina lamah thuneitute an inthlahdah ta deuh nge ni, tun hnaiah erawh plastic bag hmanga thil fûn leh zawrh, thil khai hmuh tur a pung chak leh ta hle a ni.
AMC-in plastic bag a khap tak avang hian mipui mamawh plastic bag thlakna tur siam hna mimalin an ṭan nghal vat a, harsatna awm lem loin kan kal theih phah mai. AMC in plastic bag a khap hnu-ah bag ṭawih thei chi kha mi 2-3 in an siam a, mahse hun a lo rei deuh a, khapna an kenkawh loh avangin plastic bag thlakna zawk hralh hleihtheih loh khawpin plastic bag a tam leh a.
Plastic bag thlakna siamtute tana hnual rawihna tur khawpin Aizawl leh a chhehvelah plastic bag hi hman a ni leh tho si kha a dik lo. Tuna UDPA-in khapna an tharthawh tur hi thil lawmawm tak a nih rualin, a hmaa khapna awm sa ṭha taka kenkawh a ni lo kha a zialo hle a ni.
Tunah plastic bag khapna thar siam a ni leh ta hi a lawmawm rualin, eng thilah pawh dan kan siam a nih chuan khapna thuchhuahah duh tawk mai tawh lo ila, a kenkawh hna ṭha taka thawh zui ni tawh ṭhin rawh se.
Dan kan siam a, kan kengkawh leh ṭhin lo hi kan ṭhanmawh bawk lian ber pakhat a ni.