Mizorama kuhva chingtute harsatna
Mamit District VC Association hruaitute chuan tun hnai khan Chief Minister hmuin, an district chhunga kuhva chingtute harsatna hrang hrang an thlen a; Chief Minister chuan hmalakpui a tum thu a hrilh.
Mamit District VC Association sawi danin district chhunga kuhva huan siamtuten an kuhva rah hralhna kawngah harsatna nasa tak an tawk mek a, he harsatna hi Assam lam siam ni mah se khaw chhak aṭanga dan loa Mizoram kal tlanga kuhva tawlh nen thui tak a inzawm. Tun hma aṭanga hah leh rim taka eizawnna atana kuhva chin thlangtute chuan tun hnaiah dan loa kuhva tawlhtute avangin harsatna an tawk ṭan ta a ni ber a he thil hi chinfel thuai a nih loh chuan Mizo leh Mizo karah pawh boruak ṭha lo zawk thleng thei a ni a; sorkar khap hneh loha dan bawhchhetute avangin kuthnathawktuten harsatna an tawk ti zawngin a ngaihtuah tel theih hial awm e.
Khawchhak aṭanga man tlawm zawka kuhva rah chah luh theih a nih chuan Assam lam hian Mizoram aṭanga kuhva an lei ṭhin hi zawi zawiin an titawp chho dâwn pawh a ni thei a, hei hi Kolasib leh Mamit district chhunga khúa leh chhungkaw tam tak tán ṭam hmahruai ang hial a chang thei ang. Tunah hian Kuhva rah ṭhenkhatah hian GST lâk niin Champhai district-a thar chhuah angin an tarlang nia hriat a ni a, he thil hi a tak a nih ngai chuan a taka kuhva chingtute hmuhsitna leh chem loa an lu lakna ang hial a chang thei a, sorkar pawhin a ngaihtuah ngun a ngai hle.
'A hlawk,' tih vang ringawta ram leh ram insumdawn tawnna dan bawhchhia a, awih harsa khawpa tam vawi leh khata hlep neih theihna sumdawnna hian Mizoramah kawng hrang hrangin nghawng a la nei dâwn chauh a, a tuartu hmasa chu kuhva huan neitute an ni a, a pawi viau a ni. Mizoram sorkar hian kuhva huan neitute hi chhawmdawlna a pe thei lo a nih pawhin an dikna chanvo humhimsak turin dan loa kuhvaa sumdawnna hi titawp ngam se, sorkarin an titawp thei ngang lo a nih pawhin Central YMA-te inrawlhna tur awm tak a ni lo maw?