Hma takah halpuah khap a ngai

Mizoram sorkar chuan Krismas leh kumthar vuak­vetah hâlpuah, hâlmawi, silai lem a mu kap chhuak thei leh meithallawn (sky lantern)-te a khap a, heng thilte hi hun puiah zawrh chhuah a nih lohna turin khauh takin khapna thupek an kalpui nghal niin Aizawl SP chuan a sawi.

Hunpui lawmna chi khat ang deuhin tun hma aṭangin halpuah leh hal mawi chi hrang hrang hi Mizoramah an uar hle tawh a, hengte hi mihring leh ran hriselna khawih pawi thei a nih vangin khap duhna awmin inzirtirna chak taka kalpui a ni.

Aizawl khawpuiah chuan kum eng emaw zat chhung halpuah hal hriat tur awm mumal loin hunpui hman a ni tawh. Nimahsela a sorkar berin hal hunbi neia a hal dan a ruahman leh hnuah erawh chuan in khap sen a ni ta lo a, tun hnaiah halpuah chi hrang hrang hi Aizawlah an uar thar leh ta hle.

Heng thilte khap rêm tum hian kum dang aia hmain thuneitu lam pawh­in ruahmanna siamin ṭan an la a, a lo lut tur lam an ven hneh chuan kum dang aiin halpuah a ri tlem tura ngaih a ni. Amaherawh chu lei tur a awm reng tho chuan kan in khap hneh leh lo ang tih a rin theih a, hma taka khapna thu chhuah hi a finthlak ang.

Halpuah leh halmawi chitinin Mizoram a lo luh fel vek tawh hnua hunpui dawna khap chauh chu a hlawhtling lo tih kan hre tawh a, tun aṭanga inbuatsaih hi a finthlak hle a ni.