Kawngpui dan leh state pahnih sorkar

Assam-in Mizoram ramri an rawn tihbuai avanga buaina nghawng kal zelah Mizoram châk lakna kawngpui chu rei tak dan a ni a. Chief secderary leh DC level-a inbiaknate'n awmzia a neih hleihtheih loh hnuah November 11 khan lirthei tang chhuah turin Kolasib DC leh Cachar DC-te an inbe leh a, he mi hnu hian Assam lamin lirtheite an rawn chhuah ṭan ta a ni. 

Ramri buai vanga lungawi lo Lailapur mipuiin a sarhu laia kawngpui an dang kha thil mak vak a ni lo a, hetiang hi thil thleng ngai lo pawh a ni lo. He mi hnua buaina chinfel tuma inbiakna level hrang hrang a awm hnu, Ministry of Home Affairs ruahman anga chief secretary-te meuh pawh an inbiak rem theih hnua Lailapur-a lirthei a la ding tlat mai leh, chuti chunga kan state sorkar hruaitu zinga Assam sorkar demna ṭawngkam nei ngam an awm miah lo mai kha thil mak tak a ni. 

Kawngpui titlang tura an inrem vek tawh hnua kawngpui an la dan luih tlatna hmun kha Lailapur a ni a, mi tlem te thil tih a ni tih a lang reng. Assam sorkar khan duh tak tak chu ni se Lailapur-a mi tlem te kawngpui dangtute kha a man vek thei a, Mizoram mipui min hrêk tumtute a man duh lo leh kawngpui tihtlang tuma tha a thawh miah loh avangin Assam sorkar ruahman vekah puh loh chi pawh a ni lo. Central YMA pawhin darkar 48 hun an pek thu an chhuah khan kawngpui dangtu kha 'Assam sorkar' tiin huaisen takin an ziak lang nghe nghe a ni. 

Kan ram leh a chhunga chengte min hrêk rilṭam leh min tihbuai hrim hrim tumtu sorkar demna thu sawi ngam miah lo ram hruaitu kan nei hi a vanduaithlak a ni. Tunah hian ramri chingfel tur indawr chu sawi loh kan kawngpui min dansak chhung pawhin kan dem thu kan sawi chhuak miah lo. Kan lirtheite tluang taka an rawn chhoh theih tak avang hian kan ramri hi a fel ta a ni hauh lo a, a buai ngaiin a la buai reng a, sorkar laipui lam sipaite'n an veng ta hial zawk a ni. 

Engpawhnise kawngpui a tlang ta leh Mizoram mamawhte tluang taka a lo lut hi a lawmawm a, chutihlaiin Assam sorkar mit hmuh ngeiah mi tlem tein kan kawngpui an dang chung pawha Assam sorkar demna thu pawh nei ngam lo ram hruaitu kan nei tih erawh mipuiin an hre reng tawh dawn a ni.