CS ruat leh tualchhung politics

BJP, Mizoram Pradesh chuan MNF party hruaitute chu dawt hmanga mipui hmaa thusawi lo turin an chah a, tun hnaia BJP hruaitu ṭhenkhatin Mizoram Chief Minister an zah hle tih sawi chu thu belchhian dawl loah an ngai a; mahni duhzawng Chief Secretary pawh dah thei lo CM chu Governor hnena banna thehlut tur a nih thu an sawi.

Tun hnaiah Mizo­ram Chief Minis­ter-in Union Home Minister Amit Shah hnena Chief Secretary tura Mizo ṭawng thiam ngei dah tura a ngenna chu phai lam media-te'n an chhuah a. He lehkha pawimawh hi Mizoram lam aṭanga pût ru (leak) nge a nih a, state pawn lam aṭanga lo darh ta zawk tih hriat ni lo mah se, Mizo journalist-te'n an hriat tirha ziak lo tura an tihlaiin hmun dang aṭangin a lo chhuak leh ta a ni.

He lehkhaa a lan dan chuan Mizoram CM hian Union Home Minister hnenah hian a duhzawng Chief Secretary atan a dil a ni mai lo a, an mi duhzawng pek a nih ngei theihna turin BJP kaihhruai NDA-ah a tir aṭanga rinawm taka an awm thute a ziak lang. A duha ng Chief Secretary an dah lo a nih chuan MNF chu political party dangte'n nuihza siamna atan an hman mai a hlauhawm thute Mizoram Chief Minister hian a ziak lang hial a, he thu hi phai lam media-te'n an chhuah bakah a lehkha copy hi social media lamah a darh nasa.

He thil hian media pangngai leh social media lamah khel zui leh sawi zui a hlawh a, tun hnaiah Mizoram BJP chuan rawn sawi chhuakin Mizoram Chief Minister chu mahni duhzawng Chief Secretary pawh dah thei lo, tiin an rawn chhuah chhe hle bawk.

Tunah chuan Chief Secretary ruat­na hi politics inkhelh­naah lakluh a ni ta ber a, eng thil nge nghawng a neih dawn hriat ni lo mah se thil hrisel ber erawh a ni kher lo ang. Kan CS thil tih emaw, a tih duh loh emaw zawng zawng pawh politics zawngin kan kuai her vek ang tih a hlauhawm zo ta.

Engpawhnise Chief Secretary atana Mizo ṭawng thiam ngei ruat tura dilna lehkha a darh chiam mai leh leh Chief Minister-in Union Home Minister chhiar tur atan liau liaua lehkha a ziah mipui vantlang chhiar tura a darh hi a fel lo a, tun hnua politics-a inbeih zuina atana hman pawh hi tih tawh loh theih ni se a ṭhat zawk a rinawm.