Ruihhlo hluar a manganthlak

MJA member-te puala Drugs Awareness Campaign buatsaihah Excise & Narcotic Department hotute chuan tunlai hian Mizoramah heroin a hluar hle tih an sawi a, Aizawlah chauh ni loin khaw dangah pawh a hluar avangin ngaihthah chi a nih loh thu an sawi.

Tun hnaiah thu­neitu lamin ruihhlo an man hnem hle a, ruihhlo man a tam hi chuan man loh hi a tam zawk hle ang tih a rin theih a, hei vang hian fimkhur a ṭul hle a ni. Khaw chhak aṭanga ruihhlo lo lut ṭhin hi Covid-19 avanga lockdown neih nasat kumah pawh a rem chuang lo a, Myanmar politics buailaiin han rêm ve deuh angin lang mah se, May thla tawp vel aṭangin a hlawm liana man tur a awm leh tlat mai hi a buaipuitu lam pawhin mak an ti hial a ni.

Lockdown avang leh politics-a buaina a awm avanga mihring inkalpawh a nih loh lai pawhin bungraw/ thil ṭhenkhat chu ramri lehlam aṭangin an rawn phur lut reng tho a, heng zingah hian ruihhlo hi an tawlh ru ṭhin em ni, tih zawhna piantir tur khawpa hun harsa lai bera ruihhlo a hluar tlat mai hi a manganthlak hle a ni.

Tun hnaiah hal­puah khapin sorkar leh tlawmngai pawlte an ṭang hle a, zu zuar inah ni lo kawngpui kama mi zu lei sate manin police lam an ṭul hle bawk a, hengte aimaha veiawm leh buaipui ṭul zawk nia lang chu heroin hluar zel hi a ni.

Thil dang tih ṭhulh chuang si lo hian, he hunpui lo thleng turah hian Mizoram sorkar hian heroin do beihpui thlak thei se a duhawm hle mai.