Khawpuia in sak phallohna hi

Aizawl Municipal Corpo­ration (AMC) chuan, AMC Site Development & Slope Modification (SDSM) Regulations, 2017 hnuaiah Aizawl khawpui chhungah in sak phallohna hmun an siam thar a, lei lai turin phalna lâk a ngai tawh dâwn.

Aizawl khawpui hi khawpui tawt leh chep tak a ni tawh a, chuti chung chuan a hmun âwl awm apiangah in an sâ thar zel a ni. Thuneitu lamin in sak phallohna hmun nia an sawiah te pawh in a ding zel a, chutih laiin ṭhiahsak an awm mang lo mai ni loin in a din belh zel a ni ber mai.

Tun ang zela Aizawl khawpui hi enkawl mumal loha a awm chuan a tawt zual zel mai ni loin chenna atan a hlauhawm thei hial ang tih a rin theih a; ṭhenawmte lei laih avanga hmun hlauhawma ding ta mi tam tak an awm ṭhin hi a pawi hle a ni.

Bawngkawn Durtlang chho leh Chanmari aṭanga Chaltlang panna kawng chho te pawh kut thlak phal loh nia kan hriat laiin ṭha taka dan ken kawh a nih loh avangin kut thlakna hnuhma a awm leh ṭhin a, in sak phal loh a nih hnuah pawh in a din belh hial nia sawi a awm a, kan khawpui enkawl danah hian ennawn ngai tam tak a awm a nih ngei ang.

Khawpui hian enkawltu a mamawh a, tuna ruahmanna awm thar hi hlawhtling taka kalpui theih a nih chuan khawpui pawhin a ṭhatpui ngei ang tih a rinawm a, dan hi siam a nih chuan ṭha taka bawhzui theih ni ṭhin se a duhawm hle ang.