Ramri dinhmun

Home department chuan November 8, 2021-a Mizoram leh Assam ramri depa awm district pahnih - Kolasib leh Mamit DC-te hnena ramria hmalakna titawp tura a hriattir hnuah, November 17, 2021 khan DC pahnih hi ramria hmasawnna hnathawh chhunzawm turin a hriattir.

Assam leh Mizo­ram ramri buai hi a ziaawm dawn emaw tih hnuah boruak thar a awm leh ṭhin a, tun ṭuma mi erawh buaina lam hawi ni loin ramri chhehvela hmasawnna hna­thawh chawlh lai­lawk chhunzawm leh lam a ni. Ramri humhalhna ṭha tak pakhat chu ramri chhehvela hmasawnna hna thawh hi a ni a, chu chu Mizoram sorkar pawhin thlentir tumin ramri chhehvelah nasa takin hma a la niin a lang a, a lawmawm hle.

Hetih meklai hian ramria kan dinhmun dik tak erawh chu 'hneh chang' ang maia kan lawm lai hian a hmaa kan dinhmun sa kha kan hauh phak loh palh a hlauhawm hle reng a, Vairengte daia police duty post min chhuhsak tak kan lak let leh avang ngawtin ramri hi kan zauh ta a ni lo, kuthnathawktu tam tak chuan an lo an leilet an chân mek ve bawk a, sorkar tan pawh hmalak chin tur hriatthiam a har tawh hle ang.

He ramri buaina ching­fel tur hian ramri-a kawng insiamsiak emaw, building sak emaw lam hi a ni ber dawn lo a, thuneitu sangte awmze neia an indawr a hun tawh a, 'status quo' tia tuna kan luah chin ang anga pawm lailawk hi 1875 ramri pawmtu inti state tan chuan hnungtawlhna chi khat a ni ve thei tlat a ni.