Mizorama industry-te dinhmun

Commerce & Industries minister chuan, North East Micro, Small & Medium Indus­tries Conclave-ah thu sawiin hripui leng avanga Mizorama industry-te harsatna tawh a sawi chhuak a, sorkar laipui chu ṭanpuina pe chhuak turin a ngen a, ṭanpuina tel lo chuan industry tenau ṭhenkhat tan kal chhunzawm a harsat tur thu a sawi.

Mizoram hian industry lian tham a la kalpui meuh lo a, industry tenau a kalpui ve chhunte pawhin kawng hrang hrangin harsat­na an tawk ṭhin. Hna­thawktu hlawh a san avang te, bungraw chawk luh a hautak avang te, industry hmunhma neih ṭhat tawk loh vang te, electric bill sang leh harsatna dang avangin industry tam tak chu an din aṭanga rei lo teah an zuzi leh mai ṭhin a, hetiang harsatna aṭanga khai chhuak tur hian state sorkar leh sorkar laipui an ṭan rual thiam a pawimawh takzet a ni.

Hetihlai hian Mizorama industry ṭhanmawhbawk pakhat chu industry lem tam lutuk leh subsidy sum ringawt ûma industry kalpui an awm ṭhin hi a ni a, heng mite hian a taka kalpui duhte kawng an tihpin bakah industry kalpuitute tan kawng tam takah harsatna an thlen a ni. Mizorama industry dintute dinhmun harsa tak ni sa chu hripui lengin a tihbuai belhchhah a, thawh chhuah leh hralhna awm mumal loh laia thawktu hlawh leh electric bill-a kal ral ringawt zat pawh a tam a, hei vang hian sorkar aṭanga puih hi chu an mamawh hle a ni.

Industries minis­ter hian Mizoram-a industrial unit-te khai chhuah an nih a, ṭanpuina pek theih dan tur pawh Ministry of MSME-ah an thehluh tawh thu sawiin DoNER ministry pawh he mi kawnga inrawlh turin a ngen bawk a; industry neitute harsatna hre chiang a, chhawmdawlna leh ṭanpuina dilsaktu minister hi a fakawm a, a thil dilte leh amah leh a department enkawla mite'n chak takin bawhzui zel se a ṭha hle ang.