Mau hmanga state hausa

Mizoram Chief Minister chuan tun hnai khan DoNER minister a kawm a, mau hmang ṭangkai tura hmalak mek a nih dan a hrilh a, link road mamawhna sang tak a awm tih a sawi lang bawk.

Mizoram mipuiin an nghahhlelh, kan sorkar pawhin a vei em em chu mau hmanga sum tuak hi a ni a, Chief Minister-in flagship programme tia a lo sawi hial mau hman ṭangkai theih hlan hi a nghahhlelhawm hle a ni. Mau/ rua hi kan rama awm sa ṭhahnem tak a awm a, chumi bakah chuan state pawn aṭangin a ṭha zawk tura ngaih sum tam tak sengin lakluh a ni tawh bawk a, heng te a puitlin hunah chuan mau/ rua hmang hian Mizoram chuan sum ṭhahnem tak a lalut dawn niin a lang.

Tun thleng hi chuan mau/rua hmanga sum lakluhna lam hi sawi tham kan la nei lo a, chutihlaiin kan ram hruaitute sawi dan ang a nih chuan nakin lawka kan economy sang taka dah thei tur a ni thung. Kan hotupa berin a sawi uar deuh châng phei chuan sorkar hnathawk sang bera ngaih IAS te meuh pawhin an hna bansana an thawh duh tur khawp niin mau hmanga sumdawnna len turzia a sawi hial a ni.

Mau hmanga hausa ta state hi sawi tur tam lo mah se, kan ramin a zir avang leh kan ram hruaitute'n mau hmanga sum tuak dan an ngaihtuah avangin kan la din chhuahpui thei ang tih hi ring phawt mai ila. Tunah hi chuan mau hman ṭangkai dan tur hi kan la sawi mek a, hmalak mek a la ni a, mau phunna tur leh phur chhuahna tur link road mamawhna sanziate kan la sawi mek chauh a ni.

Heng zawng zawng hi a inhrual mum hunah Mizoram hi mau hmanga intodelhtir kan sorkar hian a la tum tlat a, hei hi mipuiin an la nghak mek a ni.