Sorkar hnathawk hlawh leh sorkar

Mizorama sorkar hnathawk inzawm khawm pawl lian ber, FMGEW chuan Mizoram sorkarin sorkar hnathawkte hlawh a pe tlai ṭhin leh dearness allowance (DA)-a an chanvo a pe mai lo chu pawi an tih thu an puang a, a hun taka hlawh pe zel turin sorkar an ngen.

Hetihlai hian Agriculture minister chuan Hnam Runah thu sawiin sorkar hna­thawkin hlawh lak tur an la nei chu Chief Minister-in sum enkawl a thiam vang niin a sawi ve thung.

Mizoram sorkar hi sumah a harsa nge harsa lo tih hi sorkar hotute thusawi aṭang hi chuan hriat­thiam a harsa ṭhin hle mai a, sum awm loh thu an sawi tûk lawkah SEDP atan sum ṭhahnem tak a awm thu leh kum thar aṭanga an sem ṭan tur thu an sawi a, a chang leh finfiah hleihtheih loh thila an sum pek chhuah dan uar takin an sawi bawk. Hetih karah hian sorkar hnathawk lam chuan hun rei tak chhung a hun takah hlawh an la hleithei lo a, thla chawhnu lama hlawh lak changte pawh an nei.

Mizoram sorkar hian a hnathawkte hlawh pûkin hripui a do tawh tihte pawh kan hre tlang a, kha kha kan zavaia ṭanhona ṭha tak angin a sawi theih bawk. Chutihlaiin sorkara vawn fung chelhtu ṭhenkhat hian sum ngah leh hnathawk nasa tak anga mahni insawi len hi an sim hleithei lo a, mahni hnathawkte hlawh pawh pe kim hleithei lo chunga sorkar chetna nasatzia leh hnathawh lam sawi chiamte hi mahni mawng hlimna mai a chang palh thei.

Hripui a len vang­in state dangte pawhin harsatna an tawk a, chutihlaiin Mizoram chu thawh chhuah kan neih ve loh avangin kan buai zual pawh a ni thei. Eng anga hun harsaah pawh awm ila sorkar hnathawkte tal hi chuan an thawh hlawh hi a hun takah dang ṭhin se, kan sorkar hi a nihna ang takin lang chhuak ngam bawk se a ṭha hle ang.