AR sawn chhuak theitu Sorkar laipui

Mizoram Chief Minister chuan tun hnai khan Union Home Minister a kawm a, Assam Rifles-te Aizawl khawpui laili aṭanga Zokhawsanga sawn chhuah chungchang a sawipui.

Aizawl khawpui aṭanga Assam Rifles sawn chhuah chungchang hi kan khel rei ta hle mai a, Congress-in sorkarna vawn fung an chelhlai pawhin sawi a ni tawh. An insawn chhuak mai dawn emaw tih hnuah pawh an la chhuak si lo a, tuna kan Chief Minister ngei hian Chapchat Kutah Mizoram mipui hriatah an insawn tur thu hi a lo puang tawh nghe nghe a ni.

Hei hian chiang taka a tihlan chu Assam Rifles sawn chhuah hi state sorkar chak leh chak lohah a innghat lem lo a, 'Assam Rifles sawn chhuak theitu' ang deuha insawi chi pawh a ni lo, tih hi a ni. Mizorama Congress an sorkar hun chhung rei tak kha sorkar laipuiah pawh Congress tho an sorkar a, tunah Mizoramah MNF sorkarin an thawhpui NDA-in sorkar laipui an enkawl leh mek bawk a, chuti chung chuan kan zavaia kan duh tlan Assam Rifles sawn chhuah erawh a tak a chang thei lo.

Assam Rifles-te hian chhuah loh chhan chhuanlam an nei tawhin a lang lo a, an chenna tur ram pek a nih hnuah in sak zawh a ni tawh a. Kawng leh êng pawh an nei tawh a, an mi leh sa ṭhenkhat pawh hun rei tawk tak chu Zokhawsangah hian an awm tawh a ni.

State sorkar thil­tihtheihna hmanga sawn chhuah theih chu ni se Aizawl khawpuia Assam Rifles hmun hi a ruak tawh ngei ang tih a chiang a, sorkar laipui lamin sawn chhuah an tum hma chu heti hian an awm reng dawn niin a lang a, hei vang hian politics-a inchirhthehna leh hamṭhat lakna atan tumahin i hmang tawh lo ang u.