Dan loa petrol/ disel zawrh

Legal Metrology enforce­ment staff-te chuan tun hnai khan ITI Veng leh MIZOFED pump bulah mi paruk hnen aṭangin petrol dan lo (black)-a zawrh litre 26.5 an man. Mi parukte chu an petrol zawrh chu dan phal loh leh kângmei tichhuak thei a nih avangin zuar chhun­zawm tawh lo turin ngen an ni tawh a, ngenna an zawm loh avangin seizure certificate pein, an thil zawrhte chhuhsak an ni a, dan angin hremna kalpui tura tih a ni.

 

Mizorama dan zawm hlawh lo ber zinga mi ni ṭhin chu petrol leh diesel dan loa zawrh khapna hi a ni awm e. Petrol pump kawtah chiah langsar takin dan loa petrol zawrhte hi an ṭhutpui a, petrol pump lama intlar hman lo leh intlar peih lo mi ṭhenkhatin ualau takin black-in an dawr reng. A zuartu hian dan loa thil a zawrh vangin dan a bawhchhia a, dan loa thil zawrh leitu pawhin dan a bawhchhe ve tho a; nimahsela thuneitu lam an ngawi tlat ṭhin. 

Mizoram khaw hrang hrangah hian dan loa petrol leh diesel zawrhna hi a awm deuh vek a, khaw lian deuh lirthei tamnaah phei chuan dawr hrang hrangah an zuar tel thluah ṭhin. Dan loa thil zawrh mah ni se mipui mamawh a nih vangin sawisel a hlawh lo a, sawisel a hlawh lo mai pawh ni loin dan lo a ni tiin man tum se khawtlang an lungawi lo thei hial awm e. 

Engpawhnise dan chu dan anga kalpui mai tur a ni a, chuvangin Legal Metrology enforcement staff lamin hmu renga an hai der ṭhin dan loa petrol zawrh an man ta hi thil ṭha tak a ni. Hetihlai hian hmun danga petrol leh dielsel dan loa zawrhte pawh ngaimawh tel se, dan ang taka kal hi a ṭhain a him ber.