Taxi permit leh politics

Aizawl Two Wheeler Taxi Association (ATTA) chuan thuchhuah siamin, Transport department-in two wheeler taxi permit pek chhuah belh leh a tum chu an duh lo tih an tarlang a; an duh lohna lantir nan an taxi-ah puanzâr dum an zár.

ATTA tarlan danin, two wheeler taxi permit hi Congress hun lai khan 496 pek chhuah a ni a, MNF-in sorkarna vawnfung an chelh hnuah permit 1,889 pek chhuah a ni leh tawh. MNF hun lai hian permit tam tham tak pek chhuah a ni chung hian two wheeler taxi-te dinna tur an la siam belh lo niin an sawi bawk.

Tun hma aṭang tawhin taxi permit hi politics-a induhsakna lantirna pakhatah hman ṭhin a ni tih hi zêp thu a chêng lo a, Aizawl khawpuiah taxi intlân chhâwk ngai khawpin permit nei an tam a ni. Mipui mamawhna avangin two wheeler taxi permit pek chhuah a ni a, tunah pawh intlân chhâwk an ngai leh dêr tawh. Hei hi traffic jam tihziaawmna hmanrua mai ni loin, taxi a tam lutuk tâk avangin inṭâm chhuah thei dinhmunah an din vang a ni deuh ber.

Two wheeler taxi permit nei si, a taka hmang loa hralh chhâwng leh tam tak an awm hi a zia lo a, hei hian a mamawhte hnena permit pek chhuah lam ni loin, thil tithei leh hmelhriat nei ṭhate hnenah permit pek chhuah a tam hle tih a nemnghet âwm e.

Two wheeler taxi hi mipuiin an la mamawh belh vang ni lêm lo, tute emaw duhsakna avanga pek belh a nih mai chuan eizawnna ṭha pangngai tak hi eizawnna harsa takah kan chhuah palh thei a, chu chu Transport department kutah a innghat mêk a ni.