Thudik hailan a ngai

Mizoram Pradesh Congress Committee (MPCC) chuan thuchhuah siamin, Swadesh Darshan Scheme-II hnuaia skywalk leh ropeway siam chungchanga thil fel lo awm nia lang chu Central Bureau of Investigation (CBI) chhuitir ngei ni se an duh. He mi hma hian MNF Vigilance department leh Legal Board-te chuan Sakawrhmuituai tlanga skywalk leh Durtlang-Chaltlang inkara ropeway siam chungchanga thil dik lo leh fel tâwk lo a awm ngeia a lan avanga Mizoram Lokayukta-a complaint an thehlut tawh bawk a ni.

He sum chingpen awm ngei nia lang hi tun hnaia thil thleng ni loin tun hnaia Tuirial biala bye-election hmaa sawi chhuah kha a ni a, inthlan dawna vote zawn ngai ni ta lo se he sum chingpen lian tham tak hi sawi chhuah a ni lo hial maithei a ni. Hei hian chiang taka a lantir chu sum tam tham tak kalpui dan fel lo awm si hi a hre chiangte hian an lo thup ve ve a, inthlan dawnah vote hmuh beiseina nen an sawi chhuak chauh niin a lang.

Sum chingpen nia sawi pawh hi cheng nuai zà tam fe mai a ni a, politics-a inpuh tawnna karah hian Mizoram mipui tana sorkar laipuiin sum a pek chhuah hi tihchingpen ngei niin a lang. Ram hmasawnna tura project lian tham hi tun hma pawhin chhan hrang hrangin a lo hlamzuih tawh ṭhin a, tunlai khawvela engkim mai chhui chhuah zung zung a nih theih tawh laia sum tam tak bothlau; hun rei tak thup nia lang hi a pawi a, chhut chian chuan a thinurthlak hle a ni.

Tunah chuan MNF leh Congress party-in thil fel lo awm nia lang hi chhui an duh ve ve a, a chhui tura an duh erawh a inang lo thung. Tuna mipuiin an hriat duh chu tuin nge sum hi tichingpen a, chu pawisa chu tute kutah nge a luh a, tu nge a mawhphurtu, tih hi a ni ang.