CM-in dawt a sawi em?

Zoram People's Movement (ZPM) Ṭhalai hruaitute chuan Mizoram Chief Minister-in Covid-19 avanga Mizoram sum hmuh tur cheng vaibelchhe 2,800 hmu lo anga a sawi chu dawt a nih thu press mite hmaah an puang a, "Mizoram sorkar account report Monthly Key Indicator-a a lam danin CM thusawi hi belhchian dawl lo, mipui bum tumnaah kan ngai," an ti.

He thil kan en hian Mizoram Chief Minister emaw, ZPM Ṭhalai hruaitute zawk emaw hian dawt an sawi tihna a ni a, pakhat hi a dik chuan pakhat zawk hi chu a dik thei lo. Kan ram hruaitu ber a ni a, Finance Minister a ni tel bawk a, sum leh pai kalphung hre chiang bertu a ni a, kan pawisa chân zat a sawi hi a dik a nih chuan ZPM Ṭhalai hruaitute hi zak tur an ni a, Mizoram mipui hriatah kan Chief Minister hi dawtin an puh tihna a ni ang.

Chutihlaiin ZPM Ṭhalai hruaitu lam hi an lo dik a nih vaih chuan Mizoram state hotupa berin a state chhunga cheng mipuite dawt min hrilh tihna a ni dawn a, a zia lo hle dawn a ni. Tun hma aṭang tawhin kan politician-te'n thudik tluantling lo, finfiah hleih theih loh, finfiah dawn pawh a, "Dawt chiang tak i sawi a ni," tih theih chiah si loha thil sawi hi an ching tawh. Tunah chuan engkim hi langtlang vek a ni tawh a, thudik leh thudik lo hi a fiah zung zung thei tawh a ni.

CM hian thudik a sawi a nih chuan pawisa cheng vaibelchhe 2,800 zet kan hmuh tur kan hmuh loh dan hi ziakin fel takin mipui hnenah puang se, chuti a nih loh chuan kan state hotupa ber hian mipuite hi thudik lo min hrilh tihna a ni dawn a, mipui hian thudik hriat an phu e.