Kan rama kan chhâl chin leh kan humhalh chin

Vairengte ram chhunga Mizoram sorkar hmalakna hrang hrangte chu tun hnai khan Mizoram Journalists Association-in an tlawh a, sorkarin kawngpui thar tam tak a laih bakah police-te awmna pawh puan in kaih ngawt loa changtlubng deuh zawka siam a tum.

Ramri a buai a, thisen hial a luang ta a, hemi hnu hian Mizoram sorkar chuan ramria kan luah chin ramte chu kan neih hlen ngei theihna tur leh kan humhalh theihna turin ruahmanna thar eng emaw zat a siam. Sorkar hian tun hmaa hmasawnnain a thlen phak meuh lohna ramte pawh chei bawlin inkal pawhna kawngpui ṭha zawk a sial a, hei hi ramria duty Mizoram police-te bakah helai hmuna loneitute'n an chhawr ṭangkai hle a ni.

Ram hi kan luah loh kan dah âwl reng chuan humhalh a harsa ṭhin a, ramri inhung fel sa thlap a awm bawk si loh avangin, kan luah loh ramah hi chuan a luah duhtute hian kan hriat loh hlanin min nek a, kan harh chhuah meuh chuan a tlai tawh châwk a ni. Hetiang kara Vairengte rama hmasawnna hrang hrang hmuh tur a awm leh sorkarin ramria chengte a ngaihsak hi a lawmawm hle a ni.

Hetih lai hian Council of Minister ṭhukhawm chuan kan ramri chu 1875 ramri kha a nih thu an sawi a, chuvangin Vairengte daia hmalakna mai hi chuan kan ram hi min la luahtir mai dawnin a lang lo. Huaisen taka kan 'sawi' ṭhin kan ram hi a taka 'luah; tura hmalakna tak tak hi a la awm meuh lo a, Vairengte daia police duty-na hmun leh loneitute'n an luah sa ram hunhalhah hian kan duhtawk mai a nih chuan 1875 ramri pawmtu intite hian kan ram kan chân nasa hle tih erawh kan hriat tel a ṭha awm e.